MS Dhoni: ధోనీ ‘ఛేజింగ్‌ మంత్ర’ను అందరూ పాటించాలి: కెవిన్ పీటర్సెన్

ఇంటర్నెట్ డెస్క్: ఐపీఎల్ 2023వ సీజన్‌లో కోల్‌కతా చేతిలో రాయల్‌ ఛాలెంజర్స్‌ బెంగళూరు (RCB vs KKR) 21 పరుగుల తేడాతో ఓటమిపాలైంది. లక్ష్య ఛేదన చివరి దశలో ఆర్‌సీబీ బ్యాటర్లు దూకుడుగా ఆడటంలో విఫలమయ్యారు. ఈ క్రమంలో ఇంగ్లాండ్‌ మాజీ కెప్టెన్ కెవిన్ పీటర్సెన్ పలు కీలక వ్యాఖ్యలు చేశాడు. ఛేదన సమయంలో ఎంఎస్ ధోనీ ఎలా ఆడతాడో చూసి నేర్చుకోవాలని ఆర్‌సీబీ బ్యాటర్లకు సూచించాడు. ప్రస్తుత ప్రపంచ క్రికెట్‌లో ధోనీ ఛేదన మంత్రం పేరుగాంచిందని, చివరి వరకూ క్రీజ్‌లో ఉండి జట్టును ఎలా గెలిపించాలో అతడిని చూసి నేర్చుకోవాలని పేర్కొన్నాడు. 

‘‘ప్రత్యర్థి నిర్దేశించిన 200కిపైగా టార్గెట్‌ను ఛేదించే క్రమంలో మ్యాచ్‌ను చివరి వరకూ తీసుకెళ్లాలి. ఎంఎస్ ధోనీ ఇలా చాలాసార్లు తన జట్టును గెలిపించాడు. లోయర్‌ ఆర్డర్‌లో వచ్చి మ్యాచ్‌ను ఫినిష్‌ చేసేస్తాడు. ఎలాంటి సమయంలోనూ ఒత్తిడికి గురి కాకుండా.. కాస్త వీక్‌గా ఉన్న బౌలర్‌ను లక్ష్యంగా చేసుకుని బాదేస్తాడు. 18 లేదా 19 లేదా 20వ ఓవర్‌.. ఇలా ఏదైనా సరే వేచి చూడటం నేర్చుకోవాలి. ధోనీలా విరాట్ కోహ్లీ చివరి వరకు క్రీజ్‌లో ఉండి గెలిపిద్దామని భావించాడు. అయితే, అద్భుతమైన క్యాచ్‌ పట్టడంతో పెవిలియన్‌కు చేరాడు.  అయితే, యువ బ్యాటర్లు చాలామంది రెండొందలకుపైగా టార్గెట్‌ను చూడగానే 12 లేదా 13వ ఓవర్‌లోనే ఛేదించి గెలిపించేయాలని చూస్తుంటారు. అక్కడే త్వరగా ఔటై వెళ్లిపోతున్నారు. ప్రత్యర్థి బౌలర్లు తీవ్ర ఒత్తిడిలో ఉన్నప్పుడు ఛేదన చాలా సులువుతుంది’’ అని పీటర్సెన్ తెలిపాడు. ఐపీఎల్ 2023 సీజన్‌లో భాగంగా ఇవాళ రాజస్థాన్‌తో జయపుర వేదికగా చెన్నై సూపర్ కింగ్స్ తలపడనుంది.