ICC: ఐసీసీ అత్యంత విలువైన జట్టు ఇదే.. కోహ్లీ, సూర్యకు చోటు

దిల్లీ: పురుషుల టీ20 ప్రపంచకప్‌ 2022లో అత్యంత విలువైన ఆటగాళ్లతో కూడిన టీమ్‌ను ఐసీసీ తాజాగా ప్రకటించింది. టీమ్‌ఇండియా స్టార్‌ ఆటగాళ్లు విరాట్‌ కోహ్లీ, సూర్యకుమార్‌ ఈ జాబితాలో స్థానం దక్కించుకున్నారు. తాజా టోర్నీలో 98.66 సగటుతో 296 పరుగులు చేసిన కింగ్‌ కోహ్లీ ఈ జాబితాలో ముందు వరసలో నిలిచాడు.

పాక్‌పై అద్భుతంగా ఇన్నింగ్స్‌ ఆడిన విరాట్‌ కోహ్లీ (82*) ఒంటిచేత్తో జట్టును గెలిపించిన విషయం తెలిసిందే. బంగ్లాదేశ్‌పై 64, నెదర్లాండ్స్‌ మీద 62, ఇంగ్లాండ్‌తో 50 పరుగులు చేసి టీ20 ప్రపంచకప్‌లో విరాట్ అత్యుత్తమ బ్యాటర్‌గా నిలిచాడు. ఈ టోర్నీలో 239 పరుగులతో అదరగొట్టిన సూర్యకుమార్‌ కూడా చోటు దక్కించుకున్నాడు. నెదర్లాండ్స్‌తో 51, దక్షిణాఫ్రికాతో 68, జింబాబ్వేతో 61 పరుగులు చేసి మూడు అర్థ సెంచరీలను తన ఖాతాలో వేసుకున్న ఈ ఆటగాడు అద్భుతమైన స్ట్రైక్‌రేట్‌(189.68)ను ప్రదర్శించాడు. 

మొత్తం ఆరు దేశాల జట్లను ఇందుకోసం ఎంపిక చేశారు. కప్‌ గెలిచిన ఇంగ్లాండ్‌, రన్నరప్‌గా నిలిచిన పాకిస్థాన్‌, సెమీ ఫైనల్‌కు చేరుకున్న భారత్‌, న్యూజిలాండ్‌, జింబాబ్వే, దక్షిణాఫ్రికా వంటి దేశాలు ఈ జాబితాలో ఉన్నాయి. ఇంగ్లాండ్‌ రెండో సారి టీ20 కప్పు గెలవడంలో కీలకపాత్ర పోషించిన ఆటగాళ్లు.. కెప్టెన్‌, వికెట్‌ కీపర్‌, ఓపెనింగ్ బ్యాటర్‌ జోస్‌ బట్లర్‌, సహచర ఓపెనర్‌ అలెక్స్‌ హేల్స్‌, ఇక ప్లేయర్‌ ఆఫ్‌ ది టోర్నీగా నిలిచిన సీమర్‌ సామ్‌ కరన్‌  పేర్లను ప్రస్తావిస్తూ ఐసీసీ తన జాబితాను విడుదల చేసింది. 128 పరుగులు, 8 వికెట్లతో టీమ్‌ఇండియా ఆల్‌ రౌండర్‌ హార్దిక్‌ పాండ్య 12వ ఆటగాడిగా ఈ టీమ్‌లో చోటు దక్కించుకున్నాడు. జింబాబ్వే ఆటగాడు సికందర్‌ రజా, పాక్‌ ఆల్‌రౌండర్‌ షాదాబ్‌ ఖాన్‌, పేసర్‌ షహీన్‌ షా అఫ్రిది సైతం ఈ జాబితాలో ఉన్నారు.