నిలిచిపోయిన పీఎఫ్‌ కార్యాలయం తరలింపు

గోదావరిఖనిలోనే కొనసాగింపు

ఈనాడు, హైదరాబాద్‌, శ్రీరాంపూర్‌, న్యూస్‌టుడే: బొగ్గు గనుల ప్రావిడెంట్‌ ఫండ్‌ (సీఎంపీఎఫ్‌) ప్రాంతీయ కార్యాలయాన్ని గోదావరిఖని నుంచి హైదరాబాద్‌కు తరలించాలన్న ప్రతిపాదనను సీఎంపీఎఫ్‌ బోర్డు ఆఫ్‌ ట్రస్టీలు తిరస్కరించారు. మంగళవారం మహారాష్ట్రలోని నాగ్‌పూర్‌లో బొగ్గు మంత్రిత్వ శాఖ కార్యదర్శి అనిల్‌ కుమార్‌ జైన్‌ అధ్యక్షతన జరిగిన ట్రస్టీల సమావేశంలో ఈ మేరకు నిర్ణయం తీసుకున్నారు. గోదావరిఖనిలో ఉన్న ఈ కార్యాలయాన్ని హైదరాబాద్‌కు తరలించాలంటూ ఈ సమావేశంలో అజెండా అంశంగా పొందుపరిచారు. కాగా తరలించొద్దని సింగరేణి సీఎండీ శ్రీధర్‌ బొగ్గు మంత్రిత్వ శాఖ కార్యదర్శికి ఇటీవల లేఖ రాశారు. మంగళవారం ఈ అంశంపై చర్చకు వచ్చిన వెంటనే సమావేశంలో సింగరేణి తరఫున హాజరైన సంచాలకుడు ఎన్‌.బలరామ్‌ మాట్లాడుతూ.. గోదావరిఖనిలోనే కార్యాలయాన్ని కొనసాగించాలని కోరారు. కేంద్ర కార్మిక సంఘాలైన ఏఐటీయూసీ, బీఎంఎస్‌, హెచ్‌ఎంఎస్‌, సీఐటీయూలు కూడా ఇదే అభిప్రాయాన్ని వ్యక్తం చేయడంతో కార్యాలయ తరలింపును నిలిపివేయడానికి ట్రస్టీలు నిర్ణయించారు. బొగ్గు సంస్థల్లో పదవీ విరమణ పొందిన కార్మికులకు చెల్లించే పింఛన్‌ నిధి బలోపేతం కోసం ప్రతీ టన్నుపై అదనంగా రూ.5 పింఛన్‌ నిధికి జమచేయాలని తీర్మానించారు.