మహబూబ్‌నగర్‌-గద్వాల మార్గంలో విద్యుదీకరణ పూర్తి

ఏడాదిలో రికార్డు స్థాయిలో 385 కి.మీ: ద.మ.రైల్వే

ఈనాడు, హైదరాబాద్‌: దక్షిణ మధ్య రైల్వే జోన్‌ పరిధిలో మహబూబ్‌నగర్‌-గద్వాల స్టేషన్ల మధ్య 72.7 కిమీ మార్గం విద్యుదీకరణ పూర్తయింది.  సికింద్రాబాద్‌-మహబూబ్‌నగర్‌ మధ్య కొంతకాలం క్రితమే విద్యుదీకరణ పనులు పూర్తయ్యాయి. దీంతో సికింద్రాబాద్‌ నుంచి గద్వాల వరకు రైళ్లు విద్యుత్తు ఇంజిన్లతో ప్రయాణం చేయడానికి మార్గం సుగమం అయింది. ప్రస్తుత ఆర్థిక సంవత్సరం (2022-23)లో మొత్తం 385 కిలోమీటర్ల విద్యుదీకరణ పనులు పూర్తయ్యాయని, భారతీయ రైల్వేలోని అన్ని జోన్లలో ఇదే అత్యధికమని ద.మ.రైల్వే మంగళవారం ఓ ప్రకటనలో తెలిపింది. విద్యుదీకరణ పనులతో ఇంజిన్లు మార్చాల్సిన వ్యయప్రయాసలు తగ్గుతాయి. రైళ్ల ప్రయాణ సమయం తగ్గడంతో పాటు సగటు వేగం పెరుగుతుంది. ఇంధన ఖర్చు కూడా తగ్గుతుంది.