సికింద్రాబాద్‌-తిరుపతి వందేభారత్‌ను 8న ప్రారంభించనున్న ప్రధాని

ఈనాడు, హైదరాబాద్‌: సికింద్రాబాద్‌ నుంచి తిరుపతి మధ్య నడిచే వందేభారత్‌ రైలును ఈ నెల 8న ఉదయం 11 గంటలకు ప్రధాని మోదీ సికింద్రాబాద్‌లో ప్రారంభించనున్నారని కేంద్ర మంత్రి కిషన్‌రెడ్డి శనివారం ఓ ప్రకటనలో తెలిపారు. హైదరాబాద్‌ పర్యటనలో భాగంగా ప్రధాని రైలును ప్రారంభించడంతో పాటు పలు మౌలిక సదుపాయాల ప్రాజెక్టులకు శంకుస్థాపన చేస్తారని వెల్లడించారు.  తెలుగు రాష్ట్రాలకు  రెండో రైలు కేటాయించడంపై ప్రధానికి ఆయన కృతజ్ఞతలు తెలిపారు. సికింద్రాబాద్‌ -తిరుపతి మధ్య ప్రయాణానికి ప్రస్తుతం రైళ్లు 12 గంటల సమయం తీసుకుంటుంటే.. వందేభారత్‌ ఎక్స్‌ప్రెస్‌ 8.30 గంటల్లో గమ్యానికి చేరుకుంటుంది.  తొలిరోజు ప్రయాణంలో నల్గొండ, మిర్యాలగూడ, పిడుగురాళ్ల, గుంటూరు, తెనాలి, బాపట్ల, చీరాల, ఒంగోలు, నెల్లూరు, గూడూరు స్టేషన్లలో ఆగుతుంది. అన్ని స్టేషన్లలో ఈ రైలుకు అపూర్వ స్వాగతం పలకాలని ప్రజలకు పిలుపునిచ్చారు.