ఏప్రిల్‌లో జలాశయాల నుంచి ఎమర్జెన్సీ పంపింగ్‌

జిల్లాల్లో తాగునీటి సరఫరాపై రోజూ సమీక్షించాలి
కలెక్టర్లతో వీడియో కాన్ఫరెన్స్‌లో సీఎస్‌ శాంతికుమారి

ఈనాడు, హైదరాబాద్‌: వేసవి నేపథ్యంలో గ్రామాలు, పట్టణాల్లో తాగునీటి సరఫరాపై రోజూ టెలికాన్ఫరెన్స్‌ నిర్వహించాలని ప్రభుత్వ ప్రధాన కార్యదర్శి శాంతికుమారి జిల్లా కలెక్టర్లను ఆదేశించారు. ఎక్కడైనా సమస్యలుంటే ఎప్పటికప్పుడు పరిష్కరించి నీటి సరఫరా నిరంతరాయంగా కొనసాగేలా చూడాలన్నారు. రాష్ట్రంలో తాగునీటి సరఫరాపై జిల్లా కలెక్టర్లతో మంగళవారం ఆమె వీడియో కాన్ఫరెన్స్‌ ద్వారా సమీక్షించారు. ‘‘రాష్ట్రంలో ఈసారి లోటు వర్షపాతం ఉన్నా.. ఎస్సారెస్పీ, ఎల్లంపల్లి, నాగార్జునసాగర్‌లలో గత సంవత్సరం మాదిరిగానే నీటి మట్టాలున్నాయి. దీంతో ప్రస్తుత వేసవిలో తాగునీటికి ఏ విధమైన ఇబ్బందుల్లేవు. ఏప్రిల్‌ రెండో వారం అనంతరం జలాశయాల నుంచి అత్యవసర పంపింగ్‌ చేపడతాం. వేసవి కార్యాచరణ ప్రణాళికలో భాగంగా జిల్లాలకు అవసరమైన నిధులు విడుదల చేశాం. బోరుబావుల ఫ్లషింగ్‌, పైపుల మరమ్మతులు చేపట్టాలి. హైదరాబాద్‌ నగరంలోనూ సరిపడా నీటిని సరఫరా చేస్తున్నాం’’ అని సీఎస్‌ తెలిపారు. సమీక్షలో రాష్ట్ర పురపాలక, పంచాయతీరాజ్‌శాఖల ముఖ్యకార్యదర్శులు దానకిశోర్‌, సందీప్‌కుమార్‌ సుల్తానియా, పురపాలక సంచాలకురాలు దివ్య, జలమండలి ఎండీ సుదర్శన్‌రెడ్డి పాల్గొన్నారు.