Ukraine: యుద్ధంతో ఆహార భద్రత కరవు..: యూఎన్‌ ఎఫ్‌ఏవో ఆందోళన

ఇంటర్నెట్‌డెస్క్‌: ఉక్రెయిన్‌పై రష్యా దాడి కారణంగా ఆహార భద్రత కరవు అవుతోందని ఐరాస ఆహార, వ్యవసాయ సంస్థ (ఎఫ్‌ఏవో) నివేదిక ఆందోళన వ్యక్తంచేసింది. ఉక్రెయిన్‌పై రష్యా దాడి మొదలుపెట్టిన నాటి నుంచి ఈ సంస్థ ఇచ్చిన తొలి నివేదిక ఇదే. యుద్ధం కారణంగా నల్ల సముద్ర మార్గం మూతపడటంతో బలహీన దేశాలు ఆహారం కోసం భారీ ఖర్చు చేయాల్సి వస్తోందని ఈ నివేదికలో వెల్లడించింది.  ప్రపంచ గోధుమల్లో మూడోవంతు రష్యా, ఉక్రెయిన్‌ పండిస్తాయి. అంతేకాదు ప్రపంచంలోనే అత్యధికంగా ఎరువులు సరఫరా చేసే దేశాల్లో రష్యా ముందుంటుంది. ఈ ఏడాది ప్రపంచ వ్యాప్తంగా ఆహార ధాన్యాల దిగుమతి ఖర్చు  1.8 ట్రిలియన్‌ డాలర్లకు చేరుతుందని ఈ నివేదిక అంచనావేసింది. దిగుమతులు, ధరలు రెండూ దీనికి కారణమవుతాయని పేర్కొంది. ఫలితంగా అల్పదాయా దేశాల్లోని రైతులు రష్యా ఎరువులను కొనగలిగే స్థితి లేదని అంచనావేసింది. రష్యా వెంటనే బ్లాక్‌సీ నౌకాశ్రయాలను తెరవాలని ఐరాస కోరాలని పేర్కొంది . 

మరో పక్క రష్యా మాత్రం ఉక్రెయిన్‌ నుంచి విదేశాలకు ధాన్యం ఎగుమతులను అడ్డుకోబోమని ప్రకటించింది. ఇటీవల తుర్కియే (టర్కీ) పర్యటనకు వెళ్లిన రష్యా విదేశాంగ మంత్రి సెర్గీ లావ్రోవ్‌.. అంకారాలో తుర్కియే విదేశాంగ మంత్రి మెవ్లుత్‌ కావుసొగ్లుతో చర్చల్లో ఈ మేరకు హామీ ఇచ్చారు. అయితే- ఇందుకుగాను ఆయన ఓ షరతు విధించారు. ఉక్రెయిన్‌ భూభాగం నుంచి నల్ల సముద్రం వరకు ధాన్యం చేరుకునే మార్గాల్లో మందుపాతరలను తొలగించి సురక్షిత రవాణా మార్గాన్ని ఏర్పాటుచేయాలని డిమాండ్‌ చేశారు.