వీసాల జారీలో జోరు పెంచిన అమెరికా

శనివారం హైదరాబాద్‌లో 500 జారీ

ఈనాడు, హైదరాబాద్‌ : మనదేశం నుంచి అమెరికా వెళ్లే భారత పౌరులకు వీసాల మంజూరులో ఏర్పడుతున్న ఇబ్బందుల తొలగింపునకు అమెరికా నడుంబిగించింది. ఈ క్రమంలో తొలిసారి ప్రత్యేక శనివారం ఇంటర్వ్యూ డేస్‌ పేరిట చేపట్టిన కార్యక్రమంలో భాగంగా హైదరాబాద్‌లోని అమెరికా కాన్సులేట్‌ పరిధిలో 500 వీసాలు జారీ చేశారు. అదేవిధంగా దిల్లీలోని ఆదేశ రాయబార కార్యాలయం, ముంబయి, చెన్నై, కోల్‌కతాల్లోని కాన్సులేట్ల పరిధిలో పెద్ద ఎత్తున వీసాల మంజూరు జరిగింది. వచ్చే కొద్ది నెలలపాటు ఎంపిక చేసిన శనివారాల్లో ఈ అదనపు స్లాట్ల విడుదలను కొనసాగించనున్నారు. వీసాల జారీ ప్రక్రియను పెంచేందుకు ఈ నెల నుంచి మార్చి వరకు పెద్దఎత్తున తాత్కాలిక కాన్సులర్‌ అధికారులు భారత్‌కు చేరుకోనున్నారు. మరోపక్క దిల్లీలోని అమెరికా రాయబార కార్యాలయం సహా మిగిలిన కాన్సులేట్లలోనూ మరింతమంది శాశ్వత కాన్సులర్‌ అధికారుల నియామకానికి అమెరికా విదేశాంగశాఖ చర్యలు చేపట్టింది. మొత్తంమీద భారత్‌లో అమెరికా 2.5 లక్షల బీ1, బీ2 అదనపు ఇంటర్వ్యూ అపాయింట్‌మెంట్లను విడుదల చేసింది.