భూకంప మృతులు 12 మంది

పాకిస్థాన్‌, అఫ్గానిస్థాన్‌లలో ప్రాణనష్టం

ఇస్లామాబాద్‌: భూకంపం ప్రభావానికి పాకిస్థాన్‌, అఫ్గానిస్థాన్‌లలో కనీసం 12 మంది ప్రాణాలు కోల్పోయారు. అఫ్గాన్‌లోని హిందు-ఖుష్‌ ప్రాంతం కేంద్రంగా మంగళవారం రాత్రి సంభవించిన భూకంపం ప్రభావం ఆ దేశంతో పాటు పాకిస్థాన్‌, భారత్‌లపైనా కనిపించిన విషయం తెలిసిందే. పాకిస్థాన్‌లో లాహోర్‌, ఇస్లామాబాద్‌, రావల్పిండి, క్వెట్టా, పెషావర్‌, సియాల్‌కోట్‌, గిల్గిట్‌-బాల్టిస్థాన్‌ ప్రాంతాల్లో పలు భవనాలు దెబ్బతిన్నాయి. భయకంపితులైన ప్రజలు వీధుల్లోకి పరుగులు తీశారు. అఫ్గాన్‌ను ఆనుకుని ఉన్న ఖైబర్‌-పఖ్తుంఖ్వా ప్రాంతంలోనే 9 మంది చనిపోయారు. భూకంపం వచ్చాక గుండె ఆగిపోయి అఫ్గాన్‌లో ముగ్గురు మరణించారు.  

దిల్లీ, హిమాచల్‌లలో కంపించిన భూమి

శిమ్లా: హిమాచల్‌ప్రదేశ్‌లోని కిన్నౌర్‌ కేంద్రంగా బుధవారం తెల్లవారుజామున 2.8 తీవ్రతతో భూమి కంపించింది. ఎలాంటి నష్టం వాటిల్లలేదు. అఫ్గాన్‌ భూకంప తీవ్రతకు మంగళవారం రాత్రి కూడా హిమాచల్‌లోని దాదాపు అన్ని ప్రాంతాల్లో ప్రకంపనలు తలెత్తాయి. 24 గంటల్లో దేశంలో పలు ప్రాంతాల్లో 2 నుంచి 3 తీవ్రతతో స్వల్పస్థాయి ప్రకంపనలు 10 వరకు తలెత్తాయి. దిల్లీలో బుధవారం సాయంత్రం 2.7 తీవ్రతతో భూమి కంపించింది.