పుడమిని తాకిన శక్తిమంతమైన సౌరతుపాను

వాషింగ్టన్‌: ఆరేళ్లలో ఎన్నడూ లేనంత శక్తిమంతమైన సౌర తుపాను తాజాగా భూమిని తాకింది. ఫలితంగా భూ అయస్కాంత క్షేత్రంలో తీవ్ర అవరోధాలు తలెత్తాయని అమెరికా వాతావరణ సంస్థ పేర్కొంది. ప్రస్తుతం ఈ సౌర తుపాను చుట్టూ ఉన్న పరిస్థితులు బలహీనపడుతున్నాయని, తుపాను మాత్రం ఒక మోస్తరు స్థాయిలో కొనసాగుతోందని తెలిపింది. ఈ సౌర జ్వాల వల్ల భూమిపై కొన్నిచోట్ల హై ఫ్రీక్వెన్సీ రేడియో కమ్యూనికేషన్లకు విఘాతం కలగొచ్చని చెప్పారు. సుదూరంలోని ఎయిర్‌ ట్రాఫిక్‌ కంట్రోల్‌ టవర్లతో సంబంధాలను సాగించడానికి విమానాలు ఈ తరంగాలనే ఉపయోగిస్తుంటాయి. అయితే లోహ విహంగాల్లో చాలావరకూ ఉపగ్రహ ట్రాన్స్‌మిషన్‌ వ్యవస్థను ప్రత్యామ్నాయంగా ఉపయోగిస్తుంటాయి. ఈ సౌరతుపాను వల్ల శాటిలైట్‌ సేవల సంస్థలు తమ ఉపగ్రహాల గమనాన్ని నిశితంగా పరిశీలించడం కష్టం కావొచ్చు. పవర్‌ గ్రిడ్లకు ఇబ్బందులు కలగొచ్చు. ధ్రువ ప్రాంతాల్లో వర్ణరంజితమైన ఆరోరాలు కూడా ఏర్పడతాయని పరిశోధకులు వివరించారు. 11 ఏళ్లకోసారి సూర్యుడి అయస్కాంత తీరుతెన్నులు మారిపోతుంటాయి. ఈ కాలచక్రానికి అనుగుణంగా సౌర చర్యలు కూడా మార్పులకు లోనవుతుంటాయి. ప్రస్తుతం అవి గరిష్ఠ స్థాయిలో కొనసాగుతున్నాయి. ఈ దశను ‘సోలార్‌ మ్యాగ్జిమం’గా పేర్కొంటారు. ఈ కాలంలో భూఅయస్కాంత తుపాన్లు ఉత్పన్నమవుతుంటాయి.