చైనీయులే లక్ష్యంగా పాక్‌లో ఉగ్రదాడి!

అయిదుగురు చైనా జాతీయుల మృతి
మరో పాకిస్థానీ కూడా..

ఇస్లామాబాద్‌: పాకిస్థాన్‌లో ఉగ్రవాదులు రెచ్చిపోయారు. రెండు వేర్వేరు చోట్ల  దాడులకు పాల్పడ్డారు. ఈ ఘటనల్లో అయిదుగురు చైనీయులు, ఓ పాకిస్థానీ సహా నలుగురు ఉగ్రవాదులు మరణించారు. వాయవ్య పాకిస్థాన్‌లోని ఖైబర్‌ పఖ్తుంఖ్వా ప్రావిన్సులో మంగళవారం ఆత్మాహుతి దాడి జరిగింది. ఈ ఘటనలో పాకిస్థానీ డ్రైవర్‌తో పాటు ఐదుగురు చైనీయులు మృతిచెందారు. చైనీయులు ప్రయాణిస్తున్న బస్సు మీదకు పేలుడు పదార్థాలతో నిండిన వాహనం దూసుకుపోవడంతో ఈ ప్రమాదం జరిగినట్లు పోలీసులు తెలిపారు. మృతులంతా చైనా-పాకిస్థాన్‌ ఆర్థిక నడవాలో భాగంగా చేపట్టిన ‘దాసు జలవిద్యుత్‌ ప్రాజెక్టు’ కోసం పనిచేస్తున్నట్లు అధికారులు వివరించారు. కాగా, ఈ దాడికి ఇప్పటివరకూ ఏ ఉగ్ర సంస్థ బాధ్యత వహించలేదు.

నలుగురు ఉగ్రవాదుల హతం: పాకిస్థాన్‌లోని రెండో అతిపెద్ద నౌకాదళ వైమానిక స్థావరం పీఎన్‌ఎస్‌ సిద్ధిఖ్‌పై సోమవారం రాత్రి దాడి జరిగింది. బలూచిస్థాన్‌ రాష్ట్రం టర్బులెంట్‌ జిల్లా టర్బట్‌లో గల ఈ స్థావరంపై పలువురు తిరుగుబాటుదారులు తుపాకులు, బాంబులతో విరుచుకుపడ్డారు. వెంటనే అప్రమత్తమైన భద్రతా సిబ్బంది, పోలీసులు ఎదురుకాల్పులు జరిపారు. నలుగురు తిరుగుబాటుదారులను హతమార్చారు. ఎయిర్‌స్టేషన్‌కు ఎలాంటి నష్టం జరగలేదని వెల్లడించారు. ఈ స్థావరంలో చైనాకు చెందిన డ్రోన్లను పెద్ద ఎత్తున మోహరించినట్లు సమాచారం. ఈ దాడికి బాధ్యత వహిస్తూ ‘బలూచిస్థాన్‌ లిబరేషన్‌ ఆర్మీ’ ఓ ప్రకటన విడుదల చేసింది. తమ కాల్పుల్లో పాకిస్థానీ బలగాలకు చెందిన డజను మంది మృతిచెందినట్లు తెలిపింది. వారం రోజుల్లో ఈ ముఠా ఇలాంటి దాడికి యత్నించడం ఇది రెండోసారి.