న్యూజిలాండ్‌ పార్లమెంట్‌పై చైనా హ్యాకర్ల ఆపరేషన్‌!

వెల్లింగ్టన్‌: తమ పార్లమెంటే లక్ష్యంగా చైనా ప్రభుత్వంతో సంబంధం ఉన్న హ్యాకర్లు 2021లో రహస్య ఆపరేషన్‌ చేపట్టారని న్యూజిలాండ్‌ ఆరోపించింది. చైనాలో నివసిస్తున్న హ్యాకర్లు తమ దేశంలోని ప్రముఖులే లక్ష్యంగా పని చేస్తున్నారని అమెరికా ఆరోపించిన మరుసటి రోజే న్యూజిలాండ్‌ ఈ ప్రకటన చేయడం గమనార్హం. ఇలాంటి చర్యలు ఏ మాత్రం ఆమోద యోగ్యం కాదని.. న్యూజిలాండ్‌ రక్షణ మంత్రి జుడిత్‌ కాలిన్స్‌ పేర్కొన్నారు. ‘విదేశీ వ్యవహారాల్లో తలదూర్చడం సమంజసం కాదు. భవిష్యత్తులో ఇటువంటి కార్యకలాపాలను మానుకోవాలని చైనా రాయబారికి తెలియజేశాం’ అని విదేశాంగ మంత్రి విన్‌స్టన్‌ పీటర్‌ తెలిపారు.