Imran Khan: ఒకే ఒక్కడు.. ఏకంగా 33 స్థానాల్లో ఇమ్రాన్‌ ఖాన్‌ పోటీ

లాహోర్‌: పాకిస్థాన్‌ (Pakistan) మాజీ ప్రధాని ఇమ్రాన్‌ ఖాన్‌ (Imran Khan) సంచలన నిర్ణయం తీసుకున్నారు. త్వరలో జరగబోయే జాతీయ అసెంబ్లీ ఉప ఎన్నికల్లో ఆయన ఒక్కరే 33 స్థానాల నుంచి పోటీ చేయనున్నారు. ఈ మేరకు ఆదివారం జరిగిన పాకిస్థాన్‌ తెహ్రీక్‌ - ఇ- ఇన్సాఫ్‌ (పీటీఐ) కోర్‌ కమిటీ సమావేశంలో నిర్ణయించినట్లు పార్టీ వైస్‌ ఛైర్మన్‌ షా మహ్మద్‌ ఖురేషీ వెల్లడించారు.

ఉప ఎన్నికలు జరిగే మొత్తం 33 పార్లమెంటరీ స్థానాలన్నింటి నుంచి పీటీఐ తరఫున ఇమ్రాన్‌ ఖాన్‌ (Imran Khan) ఒక్కరే పోటీ చేయనున్నట్లు ఖురేషీ తెలిపారు. ముందస్తు ఎన్నికల విషయంలో అధికార పార్టీపై మరింత ఒత్తిడి పెంచేందుకే పీటీఐ ఈ నిర్ణయం తీసుకున్నట్లు పార్టీ వర్గాలు వెల్లడించాయి. ఈ స్థానాలకు మార్చి 16న ఉప ఎన్నిక నిర్వహించనున్నట్లు పాకిస్థాన్‌ ఎన్నికల సంఘం గత శుక్రవారం వెల్లడించింది. ఇందులో పంజాబ్‌ ప్రావిన్స్‌లో 12, ఖైబర్‌ పఖ్తుంఖ్వాలో 8, ఇస్లామాబాద్‌లో 3, సింధ్‌లో 9, బలోచిస్థాన్‌లో ఒక స్థానానికి ఈ ఎన్నికలు (Elections) జరగనున్నాయి.

గతేడాది ఏప్రిల్‌లో జరిగిన అవిశ్వాస పరీక్షలో ఓటమి తర్వాత నేషనల్‌ అసెంబ్లీ సభ్యులు రాజీనామా చేయాలని పీటీఐ అధినేత ఇమ్రాన్‌ ఖాన్‌ తమ పార్టీ ఎంపీలకు సూచించారు. అందుకు అనుగుణంగానే పీటీఐ నేతలు రాజీనామా చేశారు. అయితే, ఈ రాజీనామాలను జాతీయ అసెంబ్లీ స్పీకర్‌ ఒకేసారి ఆమోదించలేదు. వ్యక్తిగతంగా పరిశీలించాల్సి ఉందన్న కారణంతో దశల వారీగా రాజీనామాలను ఆమోదిస్తున్నారు. తాజాగా 33 మంది రాజీనామాలను అంగీకరించగా.. ఆ స్థానాలకు ఎన్నికల సంఘం ఉప ఎన్నికల షెడ్యూల్‌ విడుదల చేసింది.

మిగతా పీటీఐ (PTI) సభ్యుల రాజీనామాలను కూడా అంగీకరిస్తే.. జాతీయ అసెంబ్లీ నుంచి ఇమ్రాన్ ఖాన్‌ పార్టీ పూర్తిగా వైదొలిగినట్లవుతుంది. కాగా.. పాక్‌ ప్రస్తుత అసెంబ్లీ పదవీ కాలం ఈ ఏడాది ఆగస్టుతో ముగియనుంది. అక్కడి నుంచి 90 రోజుల్లోగా సార్వత్రిక ఎన్నికలను నిర్వహించాల్సి ఉంటుంది. అయితే, అంతకు ముందుగానే ఎన్నికలను నిర్వహించాలని ఇమ్రాన్‌ ఖాన్‌ పార్టీ (పీటీఐ) పట్టుబడుతోంది.

ఇదిలా ఉండగా.. ఇమ్రాన్‌ ఖాన్‌ ఇలా ఒకేసారి ఎక్కువ స్థానాల నుంచి పోటీ చేయడం ఇదే తొలిసారి కాదు. గతేడాది అక్టోబరులో జరిగిన జాతీయ అసెంబ్లీ ఉప ఎన్నికల్లోనూ 7 స్థానాల్లో పోటీ చేసి ఆరు చోట్ల విజయం సాధించారు. కాగా..  పాకిస్థాన్‌ ఎన్నికల్లో ఒక వ్యక్తి ఎన్ని చోట్ల నుంచైనా పోటీ చేయవచ్చు. అయితే, ఒకటి కంటే ఎక్కువ స్థానాల్లో గెలిస్తే మాత్రం ఏ స్థానాలను వదులుకుంటారో ఎన్నికల సంఘానికి తెలియజేయాల్సి ఉంటుంది.