Plane Crash: అఫ్గానిస్థాన్‌లో కుప్పకూలిన విమానం

కాబుల్‌: అఫ్గానిస్థాన్‌ (Afghanistan)లో విమాన ప్రమాదం చోటు చేసుకుంది. మొరాకోకు చెందిన ఛార్టర్డ్‌ విమానం కుప్పకూలింది. ఆదివారం ఉదయం బదాక్షన్‌ ప్రావిన్స్‌లోని జెబాక్‌ జిల్లా తోప్‌ఖానా కొండల్లో ఇది ప్రమాదానికి గురైనట్లు అఫ్గాన్‌ పోలీసులు తెలిపారు. తొలుత ఇది భారత్‌కు చెందినదని అఫ్గాన్ వార్తా సంస్థ టోలో పేర్కొంది. అయితే, ఈ వార్తలను డైరెక్టరేట్‌ జనరల్‌ ఆఫ్‌ సివిల్‌ ఏవియేషన్‌ (DGCA) ఖండించింది. అది మొరాకోకు చెందిన ఫాల్కన్‌ జెట్‌ విమానమని, దానిని ఎయిర్‌ అంబులెన్స్‌గా ఉపయోగిస్తున్నట్లు తెలిపింది. థాయ్‌లాండ్‌ నుంచి రష్యా రాజధాని మాస్కోకు బయల్దేరిన ఈ విమానం భారత్‌లోని గయ విమానాశ్రయంలో ఇంధనం కోసం ఆగినట్లు వెల్లడించింది.

మరోవైపు ఇది రష్యాకు చెందిన విమానంగా అంతర్జాతీయ వార్తా కథనాలు పేర్కొన్నాయి. తమ దేశానికి చెందిన ఫాల్కన్‌ జెట్‌ విమానం ఆరుగురు ప్రయాణికులతో శనివారం రాత్రి నుంచి రాడార్‌తో సంబంధాలు కోల్పోయిందని రష్యన్‌ విమానయాన శాఖ వెల్లడించినట్లు తెలిపాయి. ఈ ప్రమాదం మారుమూల ప్రాంతంలో జరగడంతో సహాయక బృందాలు అక్కడికి చేరుకోవడం కష్టంగా మారింది.