నామ జప పారాయణ

నామపారాయణ గురించి సందేహాలు వస్తుంటాయి. భగవంతుణ్ణి సగుణరూపంతో ఆరంభించి, నిర్గుణ సాధనకు వెళ్తే ఫలితం బాగుంటుంది. రూపం కంటే నామం గొప్పది. అది అంతఃకరణ ప్రవృత్తికీ, భగవంతుడికీ మధ్య సూత్రం. జనపనారతో తాడు తయారైనట్టు నామజపం వల్ల భగవంతుడితో బంధం బలపడుతుంది. గురువు నుంచి ఉపదేశం పొంది నామజపంచేస్తే సాధనలో వికల్పాలు ఎదురైనా గురుకృపతో తొలగుతాయి. అహం నశిస్తుంది. నామజపం ఎన్నాళ్లు చేయాలి? మధ్యలో మానేయొచ్చా? అనేది కొందరి సందేహం. నామజపంతో మనసు చెడుదారిలోకి మళ్లదు. మలినాలు తొలగి భగవత్‌ సాన్నిధ్యం దగ్గరవుతుంది. అరిషడ్వర్గాలు దహించుకుపోతాయి. అహాన్ని వదిలి శ్రద్ధాసక్తులతో చేసే నామజపం లక్ష్యంవైపు నడిపిస్తుంది. సాధకులకు నిష్ఠ అవసరం. ఉత్సాహంగా ప్రారంభించి తర్వాత ఆపేయటం తగదు. ప్రారంభంలో ఒక నిశ్చిత సంఖ్య వరకు జపం చేసే నియమం పెట్ట్టుకోవడం మంచిదే! అయితే ‘ఈ రోజు జపసంఖ్య పూర్తయింది. రేపటిదాకా నామంతో పనిలేదు’ అనుకోకూడదు. సాధ్యమైనంతసేపు చేస్తే మరింత ఆనందం అనుభూతికొస్తుంది.

- టి.వి.ఎల్‌.గాయత్రి