పరలోక ప్రాప్తి

దైవాన్ని నమ్ముకున్న వారు దిగులు పడనవసరమే లేదు. పరలోకరాజ్యం వారిదే- అన్నాడు ఏసు ప్రభువు. ఆయన వచ్చింది నిస్సహాయుల కోసం. అవగాహనా శూన్యులైన వారు అసలైన పేదలు. ‘యెహోవా ఆత్మ నాపై వాలింది, కేవలం దుఃఖించే వారిని ఓదార్చేందుకే’ అంటాడు ప్రభువు. దావీదు అంతటి మహారాజు  దైవాన్ని దీనంగా ప్రార్థించాడు. రాజాధిరాజు అయినప్పటికీ ప్రభువు ముందు అతడు పేదవాడే. కొందరు ఎంత సంపాదించినా ఎలాంటి దర్పాలూ లేకుండా వినమ్రులుగా ఉంటారు. ప్రభువు అటువంటి వారిని చేరదీశాడు. ఆయన తన శిష్యులుగా ఆహ్వానించిన బెస్తవారు ధనం లేకున్నా.. మన్నన విషయంలో గొప్పవారు. తోవ పక్క అంధులు.. ‘దావీదు కుమారా! మా కన్నులు తెరిపించు’ అని వేడుకోగా.. వారికి చూపు ప్రసాదించాడు ప్రభువు. అహంభావం వీడితే వినయాన్ని ఆశ్రయించినట్టే. అటువంటి వారికి పరలోకం ప్రాప్తిస్తుంది.

డా.దేవదాసు