మైక్రో బయాలజీలో పీజీ చేయాలంటే..?

మాలిక్యులర్‌ మైక్రోబయాలజీ పీజీ అడ్మిషన్లు హైదరాబాద్‌ కేంద్రీయ విశ్వవిద్యాలయంలో ఎప్పుడు మొదలవుతాయి? ప్రవేశపరీక్ష ఉంటుందా? ఈ కోర్సును అందించే ఇతర ప్రముఖ విద్యాసంస్థలేమిటి?

సాయి సంకీర్తన, హైదరాబాద్‌

హైదరాబాద్‌ కేంద్రీయ విశ్వవిద్యాలయం (హెచ్‌సీయూ)లో మైక్రో బయాలజీతో పాటు ఇతర పీజీ ప్రవేశాలు కామన్‌ యూనివర్సిటీ ఎంట్రన్స్‌ టెస్ట్‌ (సీయూఈటీ)- పీజీ స్కోరు ఆధారంగా జరుగుతాయి. జులై 2024లో విద్యాసంవత్సరం మొదలవుతుంది.

సీయూఈటీ నోటిఫికేషన్‌ ఇటీవలే వెలువడింది. ఆన్‌లైన్‌ దరఖాస్తులను జనవరి 24 వరకు స్వీకరిస్తారు. పరీక్షలు మార్చి 11 నుంచి 28 వరకు రోజూ 3 షిఫ్టుల్లో నిర్వహిస్తారు. సీయూఈటీలో సాధించిన స్కోరుతో కేంద్రీయ విశ్వవిద్యాలయాలతోపాటు కేంద్రం ఆధ్వర్యంలో నడుస్తున్న విద్యాసంస్థల్లో, రాష్ట్రీయ విశ్వవిద్యాలయాలూ, డీమ్డ్‌ యూనివర్సిటీలూ, ప్రైవేటు విద్యా సంస్థల్లోనూ చదువుకోవచ్చు.

మైక్రోబయాలజీ పీజీ కోర్సును అందించే దేశంలోని ఇతర ప్రముఖ విద్యాసంస్థలు-  

• పాండిచ్చేరి యూనివర్సిటీ
• దిల్లీ యూనివర్సిటీ
• మదురై  కామరాజ్‌ యూనివర్సిటీ
• యూనివర్సిటీ ఆఫ్‌ కోల్‌కతా
• ప్రెసిడెన్సీ యూనివర్సిటీ
• అమృత యూనివర్సిటీ
• ఎంఎస్‌ రామయ్య  యూనివర్సిటీ.

ప్రొ. బెల్లంకొండ రాజశేఖర్‌, కెరియర్‌ కౌన్సెలర్‌