చర్మానికి ‘జెల్లి’ రక్ష!

చలికాలం రాగానే చర్మం పొడిబారకుండా పెట్రోలియం జెల్లీ రాసుకోవటం మామూలే. ఇది చర్మ సౌందర్యానికే కాదు, ఇతరత్రా సమస్యల ఉపశమనానికీ పనికి వస్తుంది. చర్మం పొడిగా ఉంటే పుండు మానటానికి ఎక్కువ సమయం పడుతుంది. అదే తేమ తగ్గకుండా ఉంటే త్వరగా నయమైపోతుంది. ఇందుకు పెట్రోలియం జెల్లీ ఉపయోగ పడుతుంది. ఎరుపు, మంట తగ్గటానికి.. చీము పట్టకుండా ఉండటానికీ దోహదం చేస్తుంది. కొత్త చెప్పులు, బూట్లు వేసుకునే ముందు మడమలకు కాస్త జెల్లీ రాసుకొని చూడండి. ఇది చర్మం రాపిడికి గురికాకుండా చూస్తూ బొడిపె ఏర్పడకుండా కాపాడుతుంది. ఒకవేళ బుడిపె వచ్చినా నయం కావటానికి తోడ్పడుతుంది. డైపర్‌ వేసినప్పుడు కొందరు పిల్లలకు దద్దు వస్తుంది. దీని నివారణకూ పెట్రోలిజయం జెల్లీ ఉపయోగపడుతుంది. ఇందులో ఎలాంటి పరిమళాలు, నిల్వ పదార్థాలు ఉండవు. అందువల్ల పిల్లల చర్మానికి ఎలాంటి హాని చేయదు. ముక్కు కారటంతో బాధపడేవారు ముక్కు చివర కాస్త జెల్లీ రాసుకుంటే చర్మం మంట పుట్టటం తగ్గుతుంది.