మధ్యవయసు నిద్రలేమితో డిమెన్షియా!

జ్ఞాపకశక్తి, ఆలోచనా సామర్థ్యం, ప్రవర్తనలను దెబ్బతీసే డిమెన్షియా బారినపడ్డవారికి సరిగా నిద్ర పట్టకపోవటం తెలిసిందే. అయితే మధ్యవయసులో తగినంత నిద్ర పోకపోయినా డిమెన్షియా ముప్పు పెరగొచ్చు. రాత్రిపూట 6-8 గంటల సేపు నిద్రపోయేవారితో పోలిస్తే- 5 గంటల కన్నా తక్కువసేపు నిద్రించేవారికి డిమెన్షియా ముప్పు రెండు రెట్లు పెరుగుతున్నట్టు హార్వర్డ్‌ మెడికల్‌ స్కూల్‌ పరిశోధకులు గుర్తించారు. మరణించే ముప్పూ రెండింతలు ఎక్కువగా ఉంటుండటం గమనార్హం. యూరప్‌లో నిర్వహించిన మరో అధ్యయనమూ దీన్ని బలపరుస్తోంది. 50-70 ఏళ్ల వయసులో రోజుకు 6 గంటలు, అంతకన్నా తక్కువ నిద్రించేవారికి డిమెన్షియా ముప్పు 33% పెరుగుతున్నట్టు బయటపడింది. షిఫ్ట్‌ ఉద్యోగాలు, నిద్రలేమి, ఇంట్లో వాళ్ల బాగోగులు చూసుకోవటం, ఆందోళన, సరైన సమయానికి పనులు పూర్తిచేయాల్సి రావటం వంటి రకరకాల అంశాలు నిద్రను దెబ్బతీస్తుండొచ్చు. అన్నీ మన చేతుల్లో లేకపోవచ్చు గానీ కొన్నింటిని మార్చుకోవచ్చు. ఉదాహరణకు- రాత్రిపూట ఎక్కువసేపు మేల్కొని పనులు చేయటం మూలంగానే తక్కువ నిద్ర పోతుంటే తప్పకుండా మార్చుకోవచ్చు. పదవీ విరమణ సమయానికి డిమెన్షియా ముప్పునూ తగ్గించుకోవచ్చు.