ఆస్థమాకు క్యాండిల్‌ ‘పొగ’

మూడ్‌ను ఉత్తేజితం చేయటానికో, రోజంతా పడ్డ శ్రమ నుంచి విశ్రాంతి పొందటానికో ఇంట్లో పరిమళ క్యాండిల్స్‌ వెలిగించటం ఇటీవల ఎక్కువైంది. అయితే వీటిని వెలిగించే ముందు ఒకటికి రెండు సార్లు ఆలోచించు కోవటం మంచిది. ముఖ్యంగా ఇంట్లో ఆస్థమాతో బాధపడే వారుంటే మరింత జాగ్రత్తగా ఉండాలి. క్యాండిల్స్‌ వెలిగించినప్పుడు, వంట వండేటప్పుడు వెలువడే పొగలతో కలుషితమయ్యే గాలి మూలంగా ఆస్థమా బాధితుల్లో చిరాకు, వాపు ప్రక్రియ ప్రేరేపితమవుతున్నట్టు ఆర్హస్‌ యూనివర్సిటీ తాజా అధ్యయనం హెచ్చరిస్తోంది. రక్తంలో వాపు ప్రక్రియ ఆనవాళ్లతో పాటు డీఎన్‌ఏ దెబ్బతింటున్న సంకేతాలూ బయటపడటం గమనార్హం. సాధారణంగా స్టవ్‌ మీద వండుతున్నప్పుడు, క్యాండిల్స్‌ వెలిగించినప్పుడు అతి సూక్ష్మ రేణువులు, వాయువులు వెలువడతాయి. ఇవి ఇంట్లోనే తిరుగాడుతూ శ్వాస ద్వారా శరీరంలోకీ ప్రవేశించొచ్చు. ఫలితంగా ఆరోగ్యం దెబ్బతింటున్నట్టు గత అధ్యయనాల్లో తేలింది. ఈ నేపథ్యంలో పరిశోధకులు స్వల్ప ఆస్థమా గల 18-25 ఏళ్ల వారిపై ఇటీవల అధ్యయనం నిర్వహించారు. సాధారణంగా ఈ వయసువారు ఫిట్‌గా ఉంటారు. పెద్ద వయసువారితో పోలిస్తే ప్రతికూల ప్రభావాలను బాగా తట్టుకుంటారు. కానీ వంట వండుతున్నప్పుడు, క్యాండిల్స్‌ వెలిగించినప్పుడు ఇంట్లో గాలి ధారాళంగా ఆడకపోతే స్వల్ప ఆస్థమాతో బాధపడే యువత మీదా విపరీత ప్రభావం పడుతున్నట్టు పరిశోధకులు గుర్తించారు. కాబట్టి ఇంట్లో గాలి కలుషితం కాకుండా చూసుకోవాలని సూచిస్తున్నారు. తలుపులు, కిటికీలు తెరచి ఉంచటం మంచిది. ఇది ఆస్థమా తగ్గటానికే కాదు.. గుండె, ఊపిరితిత్తుల జబ్బులు, క్యాన్సర్ల ముప్పులు తగ్గటానికీ తోడ్పడుతుంది.