కంటికి మెట్‌ఫార్మిన్‌ రక్ష

ఒకటి కొంటే ఒకటి ఉచితమనే ప్రకటనలు చూస్తూనే ఉంటాం. మరి ఒక మందు వేసుకుంటే అదనంగా మరో జబ్బు నుంచీ కాపాడితే? రక్తంలో గ్లూకోజు తగ్గటానికి వాడే మెట్‌ఫార్మిన్‌ మందు ఇలాంటి పనే చేస్తున్నట్టు రెటీనా పత్రికలో ప్రచురితమైన అధ్యయనం పేర్కొంటోంది. ఇది వయసుతో ముడిపడిన మాక్యులర్‌ క్షీణత ముప్పు స్వల్పంగా తగ్గటానికి తోడ్పడుతున్నట్టు తైవాన్‌ వాసుల ఆరోగ్య సమాచార విశ్లేషణలో వెల్లడైంది. వయసు మీద పడుతున్నకొద్దీ కొందరికి కంటి రెటీనా మధ్యభాగం (మాక్యులా) క్షీణిస్తుంటుంది. నెమ్మదిగా ముదురుతూ వచ్చే ఈ సమస్య చూపు తగ్గటానికీ దారితీస్తుంది. యాబై ఏళ్లు పైబడ్డవారిలో చూపు పోవటానికి దారితీస్తున్న వాటిల్లో ఇది ప్రధానమైంది. మెట్‌ఫార్మిన్‌ వాడే మధుమేహుల్లో మాక్యులా క్షీణత ముప్పు 8% వరకూ తగ్గుతున్నట్టు తేలటం గమనార్హం.