చిట్టి పునుగులు చేద్దామా!

సాయంత్రం వేళల్లో, వాతావరణం చల్లగా ఉన్న సమయాల్లో వేడివేడిగా ఏమైనా తినాలనిపిస్తుంది కదా! అలాంటప్పుడు ఈ చిట్టి చిట్టి పునుగులు చేసుకొని టమాటా పచ్చిమిర్చి పచ్చడి లేదా కొబ్బరి చట్నీతో తింటే ఎవరైనా అమోఘమనాల్సిందే...

కావలసిన పదార్థాలు: బియ్యం- రెండు కప్పులు, మినపప్పు- కప్పు, జీలకర్ర- అరచెంచా, ఉల్లిగడ్డ- 1, సోడా- చిటికెడు, నూనె- వేయించడానికి సరిపడ, ఉప్పు- తగినంత.

తయారీ విధానం.. కప్పు మినపప్పుకి రెండు కప్పుల బియ్యం తీసుకుని ముందు రోజు కనీసం 8 గంటల పాటు నానబెట్టుకోవాలి. దాన్ని దోశ పిండిలా మెత్తగా కాకుండా కొంచెం బరకగా రుబ్బుకోవాలి. పిండి పులిస్తేనే పునుగుల రుచి బావుంటుంది. మరుసటి రోజు ఆ పిండిలో తగినంత ఉప్పు, చిటికెడు సోడా, జీలకర్ర, తరిగిన ఉల్లిపాయ ముక్కలు వేసి కలుపుకోవాలి. పాన్‌లో డీప్‌ ఫ్రైకి తగినంత నూనె పోసుకోవాలి. నూనె కాగిన తర్వాత కలుపుకొన్న మిశ్రమాన్ని చిన్న చిన్న పునుగులుగా అందులో వేసుకొని బాగా వేగ నిచ్చి తీస్తే సరి వేడి వేడి చిట్టి పునుగులు రెడీ.

రమాదేవి మన్నెం, గుంటూరు