గురువు కంటనీరు పెడితే..

అఖండమండలాకారం వ్యాప్తం యేన చరాచరమ్‌
తత్పదం దర్శితం యేన తస్మై శ్రీగురవే నమః

గురువు గొప్పతనాన్ని వివరించే శ్లోకమిది. గురు పాదాలను ఆశ్రయించి, ఆయన చెప్పే పాఠాలను ఆలకిస్తే లక్షలాది జీవజాతులు, విభిన్న వాతావరణాలతో ఉన్న ఈ భూమండలం మనకు అవగతమవుతుంది.

గురువులు దేహబలం కన్నా జ్ఞానబలంతోనే ప్రకాశిస్తుంటారు. ఆచార్యుని దైవంగా భావించడం మన సంప్రదాయం. ఆ మహనీయుని శిష్యులు వినయ సంపన్నులై సేవించాలే గానీ ఎట్టి పరిస్థితిలో కటువుగా మాట్లాడకూడదు. గురువును పరాభవిస్తే విపత్తులు తప్పవని చెబుతూ..

మహాత్మ గురుదేవానాం అశ్రుపాతః క్షితౌయది
దేశభ్రంశో మహద్దుఃఖం మరణంచ భవేద్రువమ్‌

ఉపదేశించిన శ్లోకమిది. ఎక్కడైతే గురువు దుఃఖితుడై ఆయన కళ్లలో నీరు స్రవించి, అది నేలపై పడుతుందో.. ఆ ప్రాంతం వినాశనం అవుతుంది, ఆపదలు ముంచుకొస్తాయి, బాధలు కలుగుతాయి.. ఒక్కోసారి మరణాలు కూడా సంభవిస్తాయన్నది భావం.

జి.జానకి