కానుకలు తిరస్కరించిన సద్గురువు

ఛత్రపతి శివాజీ మహారాజు గురువు సమర్థ రామదాసు. తనకు మార్గనిర్దేశనం చేస్తూ, ఆధ్యాత్మికోన్నతికి తోడ్పడుతున్న గురువుకు దక్షిణగా శివాజీ.. దుస్తులు, ఆహారసామగ్రి, ఆభరణాలు మొదలైనవి పంపాలనుకున్నారు. ఓ రోజు సైనికుల్ని పిలిచి ‘మా గురుదేవులకు అవసరమైన సామగ్రిని ఆశ్రమానికి చేర్చండి’ అని ఆదేశించారు. రాజభటులు మహారాజు ఆదేశం మేరకు దుస్తులు, ఆహారపదార్థాలు, ఆభరణాలు సమర్థరామదాసు వద్దకు తీసుకువెళ్లారు. ధ్యాననిమగ్నులైన ఆ సద్గురువు కళ్లు తెరచి, ఎదుట ఉన్న వస్తువులను చూసి ‘ఎవరి కోసం ఇవన్నీ?’ అనడిగారు. ‘మహారాజు తమరికి ఇవ్వమన్నారు!’ అన్నాడు సైన్యాధ్యక్షుడు. రామదాసు నవ్వి ‘అయ్యో! ఒక మహారాజుకే నాపై ఇంత దయ, అపేక్ష ఉంటే, సర్వలోకాలకూ అధిపతి అయిన ఆ భగవంతుడికి నాపై ఇంకెంత కరుణాకటాక్షాలు ఉంటాయి! ఇన్నాళ్లుగా నా అవసరాలు తీర్చిన ఆ పరమాత్మ, ఇకపై మాత్రం చూసుకోడా? ఈ మాటే మీ మహారాజుకు తెలియజేయండి! అన్యధా భావించవద్దని నా అభ్యర్థనగా విన్నవించండి. దయచేసి వీటన్నింటినీ తిరిగి తీసుకువెళ్లండి’ అని సున్నితంగా తిరస్కరించారు. సద్గురువులు ఆ సర్వేశ్వరుణ్ణి ఆశ్రయిస్తారే తప్పించి మరెవరి మీదా ఆధారపడరని నిరూపించారాయన.

చైతన్య