నేను మార్గశిర మాసాన్ని!

ఈ జగత్తు మాయతో కూడిందని, తాత్విక జ్ఞానం కలిగినప్పుడే.. సర్వం జగన్నాథుడనే సత్యం బోధపడుతుందని శ్రీకృష్ణపరమాత్ముడు- అర్జునుడికి తెలియజేశాడు. సూర్యుడు, చంద్రుడు, తేజస్సు.. తన స్వరూపాలే అన్నాడు. అలాగే మాసాల్లో తాను మార్గశిరం అన్నాడు. మార్గశిరంలో అధిక సంఖ్యలో పుణ్యతిథులు కనిపిస్తాయి. పండుగలు, జయంతులు ఈ మాసంలో ఎక్కువగా ఉన్నాయి. సర్వ ఏకాదశి, గోవత్స ద్వాదశి, ముక్కోటి ఏకాదశి, మాసశివరాత్రి, చంద్ర దర్శనం మొదలైన పర్వదినాలు ఈ మాసంలోనే వస్తాయి. ధనుస్సంక్రమణంతో ధనుర్మాసం మొదలవుతుంది. నాగపంచమి, సుబ్రహ్మణ్య షష్ఠి, కాలభైరవ అష్టమి పర్వదినాలు ఈ మాసంలోనే వస్తాయి. ధన్వంతరీ జయంతి, గీతాజయంతి, దత్తాత్రేయ జయంతి, రమణమహర్షి జయంతి ఈ మాసంలోనే వస్తాయి. హనుమ వ్రతం, ఆరుద్ర దర్శన మహోత్సవం- ఇలా అనేక విశేష దినాలు కలిసివస్తాయి. అన్నిటినీ మించి శ్రీకృష్ణపరమాత్మ తానే అని చెప్పిన మాసమిది. అందువల్లే మార్గశిరం విశిష్టమైంది, మహా దివ్యమైంది అనుకోవచ్చు.

ఉప్పు రాఘవేంద్ర రావు