సకలం ప్రసాదించే స్కందుడు

డిసెంబరు 31 తిరుత్తణి పడిపూజ ఉత్సవం

తమిళనాట ఆరు సుబ్రహ్మణ్య క్షేత్రాలు ప్రసిద్ధం. వాటిలో ఐదోదైన తిరుత్తణిని శాంతిపర్వతం అంటారు. తారకాసుర, శూరపద్మాసుర వంటి అసురులను సంహరించిన తర్వాత కుమారస్వామి ఈ క్షేత్రంలో తపస్సుచేసి మనోశాంతి పొందాడని, ఇక్కడే వల్లీ అమ్మను వివాహం చేసుకున్నాడని, ఇంద్రుడు, బ్రహ్మదేవుడు, శ్రీరామచంద్రుడు ఈ క్షేత్రంలో సుబ్రహ్మణ్యుణ్ణి ఆరాధించారని స్థలపురాణం తెలియజేస్తోంది. ఈ క్షేత్రంలో స్కందుని అర్చించినవారికి శాంతి సౌఖ్యాలు, సకల సౌభాగ్యాలు లభిస్తాయని, కోరిన కోర్కెలు నెరవేరతాయని చెబుతారు. ఈ ఆలయానికి శతాబ్దాల చరిత్ర ఉంది. ఈ పర్వతాన్ని తమిళులు ‘తనిగమలై’ అని పిలుస్తారు. కొండపైన ఉన్న ఆలయంలో సుబ్రహ్మణ్యుడు వల్లీదేవసేనా సమేతంగా భక్తులను అనుగ్రహిస్తున్నాడు. కొండపైకి చేరేందుకు 365 మెట్లు ఉంటాయి. ఇవి సంవత్సరంలోని 365 రోజులకు ప్రతీక. ఈ మెట్ల మార్గాన్ని అత్యంత పవిత్రంగా భావిస్తారు. రెండు శతాబ్దాల క్రితం ముత్తుస్వామి దీక్షితార్‌కు ఈ మెట్లపైనే సుబ్రహ్మణ్యస్వామి వృద్ధుని రూపంలో వచ్చి, కండచక్కెర తినిపించి అపార జ్ఞానాన్ని ప్రసాదించాడు. మరెందరో భక్తుల ఆర్తిని ఈ క్షేత్రంలో మురుగన్‌ తీర్చాడు. ఏటా డిసెంబర్‌ 31న భక్తులు వేలాదిగా తరలివచ్చి ఈ మెట్లను అర్చిస్తూ కొండపైకి వెళ్లడం ఆనవాయితీ. 1917లో వల్లిమలై స్వాముల పర్యవేక్షణలో ప్రారంభమైన పడిపూజ ఉత్సవం నేటికీ కొనసాగుతోంది. స్కందుని భక్తుల్లో అగ్రగణ్యుడైన అరుణగిరినాథర్‌ ఈ క్షేత్ర విశిష్టతను కీర్తనలుగా ఆలపించాడు. ఆయన రాసిన తిరుప్పుగళ్‌ చదువుతూ భక్తులు ఒక్కో మెట్టునూ అర్చిస్తూ పడిపూజను నిర్వహిస్తారు. కొండపైకి చేరుకుని జనవరి 1న స్వామిని దర్శించుకుంటారు. ఈ ఉత్సవంలో పాల్గొన్నవారికి ఆయురారోగ్యాలు కలుగుతాయని భక్తుల ప్రగాఢ విశ్వాసం.

గొడవర్తి శ్రీనివాసు, ఆలమూరు