మరియమ్మ ఔన్నత్యం!

ఫిబ్రవరి 9-11 గుణదల మేరీమాత శతాబ్ది ఉత్సవాలు

ఆమెకు దేవుడి ఆశీస్సులు మెండుగా ఉన్నాయి. లోకంలోని స్త్రీలందరిలోకీ ప్రత్యేక గుర్తింపు ఉందామెకి. ఆమె అందరిలా కాకుండా పవిత్రాత్మ ప్రభావంతో గర్భం దాల్చింది. ఆమెకి పుట్టింది సామాన్య మానవుడు కాడు, దైవకుమారుడు. ఆమే కన్య మరియ, ఏసుక్రీస్తును కన్న తల్లి. ఏసును లాలించి పెంచింది. దేవుడికే తల్లి అయిన మరియమ్మ.. దేవుని బిడ్డలమైన మనందరికీ కూడా మాతే కదా! ఇంతకూ దేవునికి తల్లి కావడం అంటే మాటలా! ఎన్ని అర్హతలుండాలి? అమ్మ ప్రాధాన్యత చెప్పడానికి ఎన్ని గ్రంథాలూ చాలవు. ఎంత నిర్వచించినా, ఎన్ని వివరణలు ఇచ్చినా ఆ సమగ్రత పూడ్చలేనిది. మేరీ మాత గురించి బైబిల్లో తక్కువ సందర్భాల్లో చెప్పినప్పటికీ ఆమె ఔన్నత్యం గురించి స్పష్టంగా, మహోన్నతంగానే కనిపిస్తుంది. ఏసుకు జన్మనిచ్చేందుకు మరియమ్మను ఎంచుకుని.. ఆమెని మహా స్త్రీమూర్తి స్థానంలో నిలబెట్టాడు దేవుడు.

ఏసు ప్రభువుకు వలెనే మీరీమాతనూ ఆరాధిస్తారు. మరియ చాలా చోట్ల చాలామందికి దర్శనం ఇచ్చింది. మరియమ్మను ప్రశాంతతకు, పరమ పవిత్రతకూ నిలయంగా, మాతృత్వానికి ప్రతీకగా క్రైస్తవులు నమ్ముతారు. ఆ భక్తితోనే గుణదలలో మేరీమాత ఉత్సవాలు ఘనంగా నిర్వహిస్తారు.

డా.ఆర్‌.వి.దేవదాసు