పట్టభద్రుల ఎమ్మెల్సీ ఓటర్ల జాబితాలో భారీగా అక్రమాలు

ఉత్తరాంధ్ర అభివృద్ధి వేదిక ప్రధాన కార్యదర్శి అజశర్మ

విశాఖపట్నం (డాబాగార్డెన్‌), న్యూస్‌టుడే: ఉత్తరాంధ్ర పట్టభద్రుల ఎమ్మెల్సీ ముసాయిదా ఓటర్ల జాబితాలో భారీగా అక్రమాలు చోటుచేసుకున్నాయని ఉత్తరాంధ్ర అభివృద్ధి వేదిక ప్రధాన కార్యదర్శి ఎ.అజశర్మ ఆరోపించారు. శనివారం విశాఖ అల్లూరి సీతారామరాజు విజ్ఞానకేంద్రంలో నిర్వహించిన విలేకరుల సమావేశంలో ఆయన మాట్లాడారు. అర్హత లేకపోయినా కొందరి పేర్లను జాబితాలో చేర్చారన్నారు. 3, 5, 10వ తరగతులు, ఇంటర్‌, డిప్లొమో చదివిన వారు, ఆఖరికి నిరక్షరాస్యుల పేర్లనూ అందులో చేర్చారని వివరించారు. ఎన్నికల కమిషన్‌, జిల్లా కలెక్టర్‌ స్పందించి ఎమ్మెల్సీ ఓటరు జాబితాలో అక్రమాలను పరిశీలించి బాధ్యులపై చర్యలు తీసుకోవాలని డిమాండ్‌ చేశారు.