జేఈఈ మెయిన్‌లో తొలగించిన సిలబస్‌ నుంచి ప్రశ్నలు

ప్రశ్నపత్రాల తీరుపై విద్యార్థుల ఆందోళన

ఈనాడు, హైదరాబాద్‌: జేఈఈ మెయిన్‌లో ప్రశ్నపత్రాల్లో తొలగించిన సిలబస్‌ నుంచి ప్రశ్నలు వస్తుండటంతో విద్యార్థులు ఆందోళన చెందుతున్నారు. ఈనెల 27వ తేదీ నుంచి జేఈఈ మెయిన్‌ పేపర్‌-1 పరీక్షలు జరుగుతున్న విషయం తెలిసిందే. ఈ నెల 29వ తేదీన రెండు మూడు ప్రశ్నలు తొలగించిన పాఠ్యాంశాల నుంచి రాగా...మంగళవారం జరిగిన రెండు విడతల్లో ఒక్కో దాంట్లో మూడు నాలుగు వచ్చాయని నిపుణులు తెలిపారు. ఆ తొలగించిన సిలబస్‌ మాత్రం జేఈఈ అడ్వాన్స్‌డ్‌లో ఉంటుంది. అందువల్ల అడ్వాన్స్‌డ్‌ లక్ష్యంగా సిద్ధమయ్యే వారు మాత్రం తీసేసిన పాఠ్యాంశాలను కూడా చదువుతారని, వారికి ఇబ్బంది లేకున్నా మిగిలిన వారు ఆందోళన చెందుతున్నారని చెబుతున్నారు. ముఖ్యంగా గణితం, ఆ తర్వాత భౌతికశాస్త్రంలో ఎక్కువగా ఇస్తున్నారని జేఈఈ నిపుణులు ఉమాశంకర్‌, కృష్ణ చైతన్య తెలిపారు.