Muhurat Trading: మూరత్ ట్రేడింగ్.. ఏడాదంతా లాభాల పంట!
సంప్రదాయాలు, ఆచారాలు, విశ్వాసాలకు భారత్ పెట్టింది పేరు. ఓ మంచి పని చేపట్టే ముందుకు శుభ గడియలు చూసుకొని ప్రారంభించడం భారతదేశంలో ఉన్న ఓ విశ్వాసం....
ఇంటర్నెట్ డెస్క్: సంప్రదాయాలు, ఆచారాలు, విశ్వాసాలకు భారత్ పెట్టింది పేరు. ఓ మంచి పని చేపట్టే ముందు ముహూర్తం చూసుకొని ప్రారంభించడం ఇక్కడి ఓ ఆచారం. అయితే, పురాణాల్లో పేర్కొన్న ప్రతి విశ్వాసం, సంప్రదాయం వెనుక ఓ శాస్త్రీయ కారణమూ ఉందంటారు పెద్దలు. ఈ క్రమంలో చెడుపై మంచి సాధించిన విజయానికి ప్రతీకగా జరుపుకొనేదే దీపావళి. భారత్లోని చాలా మంది ఇన్వెస్టర్లు ఈ పండుగను ప్రత్యేకంగా చూస్తారు. ఈరోజు ఏ కార్యక్రమం ప్రారంభించినా విజయం వరిస్తుందని నమ్ముతుంటారు. స్టాక్ మార్కెట్లో కూడా ఓ ఆనవాయితీ ఉంది. ఆ రోజున ప్రత్యేక సమయంలో ‘మూరత్ ట్రేడింగ్’ను నిర్వహిస్తుంటారు.
మూరత్ ట్రేడింగ్ అంటే...
స్టాక్ మార్కెట్లో దీపావళి పర్వదినం రోజు ట్రేడింగ్ చేస్తే... వచ్చే దీపావళి వరకు లాభాల పంట పండుతుందన్నది ఇన్వెస్టర్ల నమ్మకం. అందులో భాగంగానే స్టాక్ ఎక్స్ఛేంజీలు ఏటా దీపావళి రోజు ప్రత్యేకంగా మూరత్ ట్రేడింగ్ను నిర్వహిస్తాయి. ఇది ఒక గంట పాటు కొనసాగుతుంది. స్టాక్ ఎక్స్ఛేంజీలే సమయాన్ని నిర్ణయిస్తాయి. ఈ సమయంలో కనీసం ఒక్క స్టాక్ అయినా కొనాలని చాలామంది ట్రేడర్లు సెంటిమెంట్గా పెట్టుకుంటారు. ధనత్రయోదశి రోజు కనీసం ఒక గ్రాము బంగారమైనా కొనాలని ప్రజలు ఎలా ఆశపడతారో.. ఈ ట్రేడింగ్ కూడా అలాంటిదే. ఇక ఆ రోజు స్టాక్ బ్రోకింగ్ కార్యాలయాలన్నీ దీపకాంతుల్లో వెలిగిపోతుంటాయి.
ఈ సమయంలో ఏం జరుగుతుంది?
పరిమిత సమయం పాటు జరిగే ఈ ట్రేడింగ్ను కొన్ని భాగాలుగా విభజిస్తారు...
1. బ్లాక్ డీల్ సెషన్ - రెండు పార్టీల మధ్య స్టాక్ను కొనుగోలు/విక్రయానికి సంబంధించి అంగీకారం కుదురుతుంది.
2. ప్రీ-ఓపెన్ సెషన్ - స్టాక్ ఎక్స్ఛేంజీలు ఈక్విలిబ్రియం(సప్లై డిమాండ్ను సమతౌల్యం చేసే ధర)ను నిర్ణయిస్తాయి. ఈ సెషన్ సుమారు 8 నిమిషాలు ఉంటుంది.
3. నార్మల్ మార్కెట్ సెషన్ - ఈ సమయంలో అసలు ట్రేడింగ్ జరుగుతుంది.
4. కాల్ ఆక్షన్ సెషన్ - ఇల్లిక్విడ్(తేలిగ్గా అమ్ముడుపోని) సెక్యూరిటీల ట్రేడింగ్ జరుగుతంది.
5. క్లోజింగ్ సెషన్ - ముగింపు ధర వద్ద మదుపర్లు మార్కెట్ ఆర్డర్ను పెడతారు.
2021 మూరత్ ట్రేడింగ్ సమయం..
బ్లాక్ డీల్ సెషన్ - 17:45 - 18:00
ప్రీ-ఓపెన్ మార్కెట్ - 18:00 - 18:08
నార్మల్ మార్కెట్ - 18:15 - 19:15
కాల్ ఆక్షన్ సెషన్ - 18:20 - 19:05
క్లోజింగ్ సెషనల్ - 19:25 - 19:35
ఎవరికి లాభం..
ఈ సమయంలో స్టాక్స్ కొనుగోలు చేస్తే కలిసొస్తుందన్న నమ్మకంతో మాత్రమే చాలా మంది మూరత్ ట్రేడింగ్లో పాల్గొంటారు. కేవలం గంట పాటే సాగుతుంది గనుక భారీ స్థాయిలో ఊగిసలాట ధోరణికి అవకాశం ఉంది. కాబట్టి ట్రేడర్లు, మదుపర్లు, కొత్తగా స్టాక్ మార్కెట్లోకి ప్రవేశించిన వారు కూడా ఈ ట్రేడింగ్లో పాల్గొనవచ్చు. మంచి నాణ్యమైన స్టాక్స్ని ఎంచుకొని దీర్ఘకాలం పాటు వాటిని నిలిపి ఉంచుకునేందుకు ప్రయత్నించండి. ఇప్పటికే మార్కెట్లో మంచి అనుభవం గడించిన ట్రేడర్లు ఈ మూరత్ ట్రేడింగ్లో భారీగా లాభపడే అవకాశం ఉంది. ఎందుకంటే చాలా మంది కేవలం సెంటిమెంటు కోసం మాత్రమే కొనుగోలు చేసి వెంటనే అమ్మేస్తుంటారు. లాభాలపై పెద్దగా దృష్టి పెట్టరు. 2020లో కరోనా మహమ్మారి కారణంగా మూరత్ ట్రేడింగ్ ఆశించిన స్థాయిలో జరగలేదు. ఈ నేపథ్యంలో ఈసారి భారీ స్థాయిలో ట్రేడింగ్ జరిగే అవకాశం ఉందని అంచనా వేస్తున్నారు.
ఇవి దృష్టిలో పెట్టుకోండి..
☀ చాలా మంది ట్రేడర్లు, మదుపర్లు కేవలం సెంటిమెంటు కోసం మాత్రమే లావాదేవీలను నిర్వహిస్తారు.
☀ ట్రేడింగ్ ముగిసే సమయానికి ఓపెన్గా ఉన్న పొజిషన్లకు సెటిల్మెంట్ నిబంధనలు వర్తిస్తాయి.
☀ ట్రేడర్లు నిరోధం(రెసిస్టెన్స్), మద్దతు(సపోర్ట్) స్థాయిలను క్షుణ్నంగా పరిశీలించాలి.
☀ కంపెనీ ఫండమెంటల్స్ని దృష్టిలో ఉంచుకొనే ట్రేడింగ్ చేయాలి. మీ దీర్ఘకాల పెట్టుబడి ప్రణాళికలను అనుసరించే స్టాక్స్ను కొనుగోలు చేయాలి.
☀ ఈ రోజు కొన్న స్టాక్ కచ్చితంగా రాబడి ఇస్తుందని నమ్మకం లేదు. లాభాలు పూర్తిగా ఆ కంపెనీ పనితీరుపైనే ఆధారపడి ఉంటాయని గుర్తుంచుకోవాలి.
(**గమనిక: స్టాక్ మార్కెట్లో పెట్టుబడి నష్టభయంతో కూడుకొన్న అంశం. స్టాక్స్లో మదుపు చేయడం పూర్తిగా మీ వ్యక్తిగత నిర్ణయం. పైన తెలిపిన సమాచారం కేవలం అవగాహన కోసం మాత్రమే)
Trending
గమనిక: ఈనాడు.నెట్లో కనిపించే వ్యాపార ప్రకటనలు వివిధ దేశాల్లోని వ్యాపారస్తులు, సంస్థల నుంచి వస్తాయి. కొన్ని ప్రకటనలు పాఠకుల అభిరుచిననుసరించి కృత్రిమ మేధస్సుతో పంపబడతాయి. పాఠకులు తగిన జాగ్రత్త వహించి, ఉత్పత్తులు లేదా సేవల గురించి సముచిత విచారణ చేసి కొనుగోలు చేయాలి. ఆయా ఉత్పత్తులు / సేవల నాణ్యత లేదా లోపాలకు ఈనాడు యాజమాన్యం బాధ్యత వహించదు. ఈ విషయంలో ఉత్తర ప్రత్యుత్తరాలకి తావు లేదు.