స్పైస్‌జెట్‌ విమానంలో ప్రయాణిస్తూనే క్యాబ్‌ బుకింగ్‌

ముంబయి: విమానంలో ప్రయాణిస్తున్నప్పుడే, గమ్యస్థానం చేరాక క్యాబ్‌ను బుక్‌ చేసుకునే కొత్త సదుపాయాన్ని స్పైస్‌జెట్‌ అందుబాటులోకి తెచ్చింది. విమానసంస్థకు చెందిన ఇన్‌-ఫ్లైట్‌ ఎంటర్‌టైన్‌మెంట్‌ ప్లాట్‌ఫాం ‘స్పైస్‌స్క్రీన్‌’ను ఇందుకు ఉపయోగించుకోవచ్చు. దీనిలో వివరాలు బుక్‌ చేసుకుంటే, విమానాశ్రయానికి చేరగానే ప్రయాణికుడి మొబైల్‌కు ఓటీపీ, కాల్‌ కూడా వస్తుంది. ఆన్‌లైన్‌ చెల్లింపులు చేయొచ్చు. తొలి దశలో ఈ సేవను దిల్లీ విమానాశ్రయంలో గురువారం ప్రారంభించారు. త్వరలోనే హైదరాబాద్‌, బెంగళూరు, ముంబయి, గోవా, చెన్నై, కోల్‌కతా, అహ్మదాబాద్‌, పుణె విమానాశ్రయాల్లో దశలవారీగా స్పైస్‌జెట్‌ అందుబాటులోకి తేనుంది.