పాస్‌వర్డ్‌ పంచుకోవడంపై నెట్‌ఫ్లిక్స్‌ ఆంక్షలు

వినియోగదారులు తగ్గడమే కారణం

శాన్‌ఫ్రాన్సిస్కో (అమెరికా): జనవరి- మార్చిలో నెట్‌ఫ్లిక్స్‌కు రెండు లక్షల మంది చందాదారులు తగ్గారు. గత పదేళ్లలో నెట్‌ఫ్లిక్స్‌ చందాదారులను కోల్పోవడం ఇదే మొదటిసారి. ఈ నేపథ్యంలో నెట్‌ఫ్లిక్స్‌ ఎప్పటినుంచో తీసుకురావాలని భావిస్తున్న మార్పులపై దృష్టిపెట్టింది. ఖాతాను ఇతరులతో కలిసి వాడేందుకు పాస్‌వర్డ్‌ పంచుకోవడాన్ని పరిమితం చేయనుందని, ప్రకటనలతో కూడిన చౌక చందా పథకాలను తీసుకురానున్నట్లు తెలుస్తోంది. ద్రవ్యోల్బణం, ఉక్రెయిన్‌-రష్యా యుద్ధం, యాపిల్‌, వాల్ట్‌ డిస్నీ వంటి సంస్థలతో పోటీ కారణంగా గత త్రైమాసికంలో చందాదారులు తగ్గారని సంస్థ తెలిపింది.  కంపెనీ రష్యాలో సేవలు నిలిపివేసినందున 7 లక్షల మంది చందాదారులను కోల్పోయింది. ఏప్రిల్‌-జూన్‌ మధ్య మరో 20 లక్షల మంది ఖాతాదారులు తగ్గొచ్చని అంచనా వేసింది. మార్చికి ప్రపంచవ్యాప్తంగా నెట్‌ఫ్లిక్స్‌కు 22.16 కోట్ల మంది చందాదారులు ఉన్నారు. చందాదారులు తగ్గడంతో, బుధవారం షేరు విలువ 36 శాతం పతనమైంది. గత 4 నెలల్లో నెట్‌ఫ్లిక్స్‌ షేరు విలువ సగానికి పైగా తగ్గి, వాటాదార్ల సంపద 150 బిలియన్‌ డాలర్ల (సుమారు రూ. 11.25 లక్షల కోట్ల) మేర హరించుకుపోయింది.