HDFC: హెచ్‌డీఎఫ్‌సీ రుణ రేటు 5 బేసిస్‌ పాయింట్ల పెంపు

దిల్లీ: గృహ రుణ సంస్థ హెచ్‌డీఎఫ్‌సీ ప్రామాణిక రుణ రేటును 5 బేసిస్‌ పాయింట్లు (0.05 శాతం) పెంచుతున్నట్లు బుధవారం ప్రకటించింది. దీంతో ఇప్పటికే ఉన్న రుణ గ్రహీతలకు నెలవారీ వాయిదాలు (EMI) భారం కానున్నాయి. గృహ రుణాలపై రిటైల్‌ ప్రైమ్‌ లెండింగ్‌ రేటును (RPLR‌) ఈ రోజు నుంచి 5 బేసిస్‌ పాయింట్ల మేర పెంచుతున్నట్లు కంపెనీ తెలిపింది. కొత్త రుణ గ్రహీతలకు అందించే వడ్డీ రేట్లను వారి క్రెడిట్‌ స్కోరు, రుణం మొత్తాన్ని బట్టి 7.05-7.50 శాతం మధ్య ఉంచింది. గత నెలలోనూ హెచ్‌డీఎఫ్‌సీ రుణ రేట్లను 35 బేసిస్‌ పాయింట్లు పెంచింది. మే నెలలో ఆర్‌బీఐ రెపో రేటును 40 బేసిస్‌ పాయింట్లు పెంచిన తర్వాత బ్యాంకులు, బ్యాంకింగేతర సంస్థలు రుణరేట్లను సవరిస్తున్న విషయం తెలిసిందే.