Indigo AI chatbot: ఇండిగో నుంచి ఏఐ చాట్‌బాట్.. తెలుగులోనూ సేవలు

Indigo AI chatbot | ఇంటర్నెట్‌ డెస్క్‌: దేశీయ విమాయాన సంస్థ ఇండిగో (Indigo) 6Eskai పేరిట ఏఐ చాట్‌బాట్‌ (Indigo AI chatbot) సేవలను ప్రారంభించింది. టికెట్ల బుకింగ్‌ సహా కస్టమర్లు అడిగే ప్రశ్నలకు ఈ చాట్‌బాట్‌ పది భాషల్లో సమాధానం ఇస్తుంది. ఇంగ్లీష్‌, హిందీతో పాటు ప్రాంతీయ భాషలైన తెలుగు, కన్నడ, తమిళం, మలయాళం భాషల్లోనూ ఈ ఏఐ చాట్‌బాట్‌ స్పందిస్తుంది. మైక్రోసాఫ్ట్‌తో కలిసి ఇండిగో డిజిటల్‌ టీమ్‌ ఈ కొత్త ఏఐ చాట్‌బాట్‌ను అభివృద్ధి చేసింది. జీపీటీ-4 టెక్నాలజీని ఇందులో వినియోగించారు.

ఈ చాట్‌బాట్‌ వల్ల కస్టమర్‌ సర్వీస్‌ ఏజెంట్లపై 75 శాతం వరకు పనిభారం తగ్గుతుందని ఇండిగో తెలిపింది. కస్టమర్లు తరచూ అడిగే వివిధ రకాల ప్రశ్నలకు ఈ చాట్‌బాట్‌ సమాధానం ఇస్తుందని పేర్కొంది. విమాన టికెట్‌ బుకింగ్‌, వెబ్‌చెక్‌-ఇన్‌, సీట్‌ సెలక్షన్‌, ఇటిర్నరీ డౌన్‌లోడ్‌, జర్నీ లేదా ట్రిప్‌ ప్లానింగ్‌ వంటి సేవలను ఈ ఏఐ చాట్‌బాట్‌ అందిస్తుంది. డిస్కౌంట్‌ కూపన్ల వినియోగంలోనూ ఏఐ చాట్‌బాట్‌ సహాయపడుతుంది. టెక్ట్స్‌ మాత్రమే కాకుండా స్పీచ్‌ ఆప్షన్‌ ద్వారా మనం ఇచ్చే కమాండ్లకు టెక్ట్స్‌ రూపంలో ఈ ఏఐ చాట్‌బాట్‌ సమాధానం ఇస్తుంది.

ఆర్‌బీఐ నిబంధనలు కఠినతరం.. పర్సనల్‌ లోన్‌ పొందడం ఇప్పుడెలా?

కస్టమర్‌ ఎక్స్‌పీరియన్స్‌ను మెరుగుపరచడం కోసం దీన్ని ప్రారంభించామని, దీనివల్ల బుకింగ్‌ ప్రక్రియ మరింత సరళతరం కానుందని ఇండిగో ఓ ప్రకటనలో తెలిపింది. కేవలం యూజర్ల ప్రశ్నలకు సమాధానాలు మాత్రమే కాకుండా.. సంభాషణల మధ్యలో మనిషిలానే భావోద్వేగాలను సైతం ఈ ఏఐ చాట్‌బాట్‌ జోడిస్తుందని తెలిపింది. ఈ సేవల పట్ల వినియోగదారులు సంతృప్తి చెందుతారని ఆశాభావం వ్యక్తంచేసింది. దీనికితోడు తమ నిర్వహణ సామర్థ్యం సైతం మెరుగుపడుతుందని ఇండిగో తెలిపింది.