50మంది చిన్నారులపై లైంగికవేధింపులు.. అరెస్ట్‌‌!

దిల్లీ: యూపీలో చిన్నారులపై లైంగిక వేధింపుల ఘటన కలకలం సృష్టించింది. పదుల సంఖ్యలో చిన్నారులపై లైంగికంగా వేధింపులకు పాల్పడిన ఓ ప్రభుత్వ జూనియర్‌ ఇంజినీర్‌ను సీబీఐ అధికారులు అరెస్టు చేశారు. ఆ వ్యక్తి పదేళ్ల వ్యవధిలో దాదాపు 50 మంది చిన్నారులపై వేధింపులకు పాల్పడినట్లు అధికారులు పేర్కొన్నారు. సీబీఐ ప్రతినిధి ఆర్కే గౌర్‌ వెల్లడించిన ప్రకారం.. ‘చిత్రకూట్‌ జిల్లాకు చెందిన రామ్‌భవన్‌ అనే వ్యక్తి యూపీలో ప్రభుత్వ ఇంజినీర్‌గా విధులు నిర్వహిస్తున్నాడు. అతడు బండ, చిత్రకూట్, హమీర్పూర్‌ జిల్లాల్లో 5 నుంచి 16ఏళ్ల మధ్య వయసున్న దాదాపు50 మంది చిన్నారులపై లైంగిక వేధింపులకు పాల్పడినట్లు ఆరోపణలు ఉన్నాయి. దీంతో అతడిని బండ జిల్లాలో అరెస్టు చేసి సంబంధిత న్యాయస్థానంలో ప్రవేశపెట్టాం. నిందితుడి ఇంటిపై నిర్వహించిన సోదాల్లో 8 మొబైల్‌ ఫోన్లు, రూ.8లక్షల నగదు, ల్యాప్‌టాప్‌, ఇతర డిజిటల్‌ సాక్ష్యాలు, భారీ సంఖ్యలో చిన్నారుల లైంగిక వేధింపులకు సంబంధించిన మెటీరియల్స్‌, వీడియోలు స్వాధీనం చేసుకున్నాం. ఆ సమాచారాన్ని షేరింగ్‌ చేసుకునే విషయంలో అతడు పలువురు విదేశీయులతో సంబంధాలు కలిగి ఉన్నట్లు ఈమెయిల్స్‌ ఆధారంగా తెలిసింది. తాను చేసే అసాంఘిక కార్యకలాపాల గురించి చిన్నారులు బయట చెప్పకుండా ఉండేందుకు మొబైల్‌ఫోన్లు, ఇతర ఎలక్ట్రానిక్‌ పరికరాలు వారికి లంచంగా ఇచ్చేవాడినని నిందితుడు దర్యాప్తులో చెప్పాడు’ అని ఆయన వెల్లడించారు.