బిహార్‌లో బ్యాంకు చోరీ 

హజీపూర్‌: బ్యాంకులోకి నలుగురు చొరబడ్డారు. ఆయుధాలతో బెదిరిస్తూ డబ్బు తీసుకుని సంచుల్లో నింపుకున్నారు. ఏం జరుగుతుందో తెలుసుకునే లోపే కోటి రూపాయలతో పరారయ్యారు. సిని ఫక్కీలో జరిగిన చోరీ ఘటన బిహార్‌లోని వైశాలి జిల్లాలో చోటుచేసుకుంది. 

హజీపూర్‌ ప్రాంతంలోని జదువా బజార్‌ ప్రాంతంలో గల ఓ ప్రైవేటు బ్యాంకు బ్రాంచీలో గురువారం భారీ చోరీ జరిగింది. ఈ బ్యాంకు కేంద్ర హోంశాఖ సహాయ మంత్రి నిత్యానందరాయ్‌ నివాసానికి సమీపంలోనే ఉండటం గమనార్హం. ఈ ఉదయం బ్యాంకు తెరిచిన కాసేటికి నలుగురు వ్యక్తులు ముసుగులు ధరించి ఆయుధాలతో లోపలికి వచ్చారు. ఉద్యోగులను బెదిరించి క్యాష్‌ రూం నుంచి డబ్బు తెప్పించారు. ఆ తర్వాత నగదును సంచుల్లో నింపుకుని అంతే వేగంగా అక్కడి నుంచి పరారయ్యారు. 

ఈ ఊహించిన ఘటనతో దిగ్భ్రాంతి చెందిన బ్యాంకు సిబ్బంది వెంటనే పోలీసులకు సమాచారమిచ్చారు. ఘటనాస్థలానికి చేరుకున్న పోలీసులు సీసీటీవీ రికార్డులను పరిశీలించారు. నిందితుల కోసం గాలిస్తున్నట్లు తెలిపారు.