Crime news: బాలికపై ఘోరం.. నాన్నే నరరూప రాక్షసుడయ్యాడు!

కన్నౌజ్‌: కన్న కూతురిని కంటికి రెప్పలా కాపాడాల్సిన తండ్రే మానవ మృగంలా మారాడు. తల్లిలేని ఆ పసిపాప ఆలనా పాలనా చూడాల్సిన వాడే ఆ బంగారు తల్లి జీవితాన్ని సర్వనాశనం చేశాడు. వావివరసలు మరిచి అభం శుభం తెలియని ఆ 12 ఏళ్ల బాలికపై అత్యాచారానికి పాల్పడ్డాడు. అత్యంత దారుణమైన ఈ ఘటన ఉత్తర్‌ప్రదేశ్‌లోని కన్నౌజ్‌లో గురుసహాయ్‌గంజ్‌ కొత్వాలి పోలీస్‌స్టేషన్‌ పరిధిలో చోటుచేసుకుంది. పోలీసులు తెలిపిన వివరాల ప్రకారం.. సోమవారం రాత్రి బాలిక తన అత్త వద్ద నిద్రపోతుండగా.. నిందితుడు ఆమెను బలవంతంగా వేరే గదిలోకి ఎత్తుకెళ్లాడు. ఆ తర్వాత బాలికపై అఘాయిత్యానికి ఒడిగట్టాడు. ఆ సమయంలో బాలిక ఏడుపు విన్న ఆమె అత్త కేకలు వేయడంతో పాటు పోలీసులకు సమాచారం ఇచ్చారు. దీంతో అతడిని పోలీసులు అదుపులోకి తీసుకున్నారు. అయితే, బాలిక తాత ఇచ్చిన ఫిర్యాదు మేరకు కేసు నమోదు చేసినట్టు పోలీసులు వివరించారు. బాలికను వైద్య పరీక్షల కోసం జిల్లా ఆస్పత్రికి తరలించినట్టు గురుసహాయ్‌గంజ్‌  పోలీస్‌ స్టేషన్‌ ఇన్‌ఛార్జి రాజ్‌కుమార్‌ సింగ్‌ తెలిపారు. పదేళ్ల క్రితమే బాలిక తల్లి చనిపోగా.. అప్పట్నుంచి అదృశ్యమైన నిందితుడు నాలుగైదు రోజుల క్రితమే ఇంటికి వచ్చాడని పోలీసులు తెలిపారు.