అధికారులు రాని గ్రామసభలెందుకు?

గ్రామసభలో మాట్లాడుతున్న సర్పంచి పరదేశీ

సీలేరు, న్యూస్‌టుడే: అధికారులు రాని గ్రామసభలు తమకెందుకని సీలేరు గ్రామస్థులు ప్రశ్నించారు. సోమవారం సీలేరు పంచాయతీ కార్యాలయంలో సర్పంచి కె.పరదేశీ అధ్యక్షతన గ్రామసభ జరిగింది. పంచాయతీ పరిధిలో చేపట్టిన పనుల వివరాలను కార్యదర్శి శ్రీనివాసు వివరించారు. సర్పంచి మాట్లాడుతూ జాబ్‌కార్డుదారులందరికీ ఉపాధి పనులు కల్పించాలన్నారు. ఎస్సై రామకృష్ణ మాట్లాడుతూ వీధుల్లో పశువుల సంచారం ఎక్కువగా ఉందని, వీటిని యజమానులు పట్టించుకోకపోతే గోశాలకు తరలిస్తామని చెప్పారు. ఈ సందర్భంగా అధికారుల తీరుపై గ్రామస్థులు ఆందోళన వ్యక్తంచేశారు. గ్రామసభలు తూతూమంత్రంగా నిర్వహిస్తున్నారని, మండలస్థాయి అధికారులు ఎవరూ రావడం లేదన్నారు. మేజర్‌ పంచాయతీ పరిస్థితే ఇలా ఉంటే.. మిగతా చోట్ల ఎలా ఉంటుందో అర్థం చేసుకోవచ్చన్నారు. ఎంపీటీసీ సభ్యుడు పి.సాంబమూర్తి, ఉప సర్పంచి కె.వల్లీప్రసాదు పాల్గొన్నారు.