పింఛను మంజూరు చేయరూ..

పిల్లలతో పార్వతి

చింతపల్లి గ్రామీణం, న్యూస్‌టుడే: తనకు వితంతు పింఛను మంజూరు చేయాలని తాజంగి గ్రామానికి చెందిన గిరిజన మహిళ తమర్బ పార్వతి అధికారులను వేడుకుంటోంది. ఈమె భర్త రాజబాబు మూడేళ్ల క్రితం రోడ్డు ప్రమాదంలో మరణించాడు. వీరికి ఇద్దరు చిన్నారులు ఉన్నారు. భర్త మరణించిన తరువాత వితంతు పింఛను కోసం దరఖాస్తు చేసుకున్నా.. నేటికీ రాలేదు. అధికారుల చుట్టూ ఎన్నిసార్లు తిరిగినా ప్రయోజనం ఉండటం లేదని ఆమె వాపోతోంది. తనకు ఎటువంటి ఆధారం లేదని, కూలి పనులు చేసుకుని జీవనం సాగించాల్సి వస్తోందని ఆవేదన వ్యక్తం చేస్తోంది. దీనిపై పంచాయతీ కార్యదర్శి గోవిందును సంప్రదించగా హౌస్‌ ఓల్డ్‌ మ్యాపింగ్‌ అవ్వని కారణంగా పింఛను మంజూరు చేయలేకపోతున్నామని పేర్కొన్నారు.