నాలుగేళ్లయినా అవస్థలే..!

నిత్యావసర సరకులతో కాలినడకన వెళ్తున్న గిరిజనులు

డుంబ్రిగుడ, న్యూస్‌టుడే: మన్యంలో రహదారి సదుపాయం లేక గిరిజనులకు రవాణా కష్టాలు తీరడం లేదు. కొల్లాపుట్టు పంచాయతీ ఎగువ కొల్లాపుట్టులో మెటల్‌ రోడ్డు నిర్మాణం అసంపూర్తిగా నిలిచిపోయింది. నాలుగేళ్ల క్రితం ఇక్కడ పనులు ప్రారంభించినా నేటికీ పూర్తికాలేదు. ఈ మార్గంలో కనీసం ద్విచక్రవాహనం కూడా వెళ్లలేని పరిస్థితి ఏర్పడిందని గిరిజనులు వాపోతున్నారు. రోగులను ఆసుపత్రుల్లో తరలించేందుకు డోలీ మోతలే దిక్కవుతున్నాయని ఆవేదన వ్యక్తం చేస్తున్నారు. కిలోమీటర్లు నడిచి నిత్యావసరాలు తెచ్చుకోవాల్సి వస్తోందని చెబుతున్నారు. అధికారులు, ప్రజాప్రతినిధులు స్పందించి అసంపూర్తి రోడ్డు నిర్మాణానికి చర్యలు చేపట్టాలని గిరిజనులు కోరుతున్నారు.