మహిళను చంపి.. ముక్కలు చేసి..

ఈనాడు, విశాఖపట్నం, న్యూస్‌టుడే: విశాఖలోని మధురవాడ వికలాంగుల కాలనీలో తీవ్ర సంచలనం సృష్టించిన మహిళ హత్య కేసులో పలు ఆసక్తికర విషయాలు వెలుగులోకి వస్తున్నాయి. ఈ ఘటనలో హత్యానంతరం శరీరాన్ని ముక్కలు చేసి... ఏమాత్రం వాసన రాకుండా పకడ్బందీగా ప్యాకింగ్‌ చేసినట్లు పోలీసులు గుర్తించారు. మృతదేహాన్ని ప్లాస్టిక్‌ సంచుల్లో కుక్కి భారీ ప్లాస్టిక్‌ డ్రమ్ములో భద్రపరచినట్లు ఆదివారం వెలుగులోకి వచ్చిన విషయం తెలిసిందే. అద్దె ఇంటి యజమాని సంబంధిత నివాసాన్ని ఖాళీ చేయించడానికి రావడంతో ఈ గుట్టు రట్టయింది. ఇంటి యజమాని రాకుంటే ఆమె మృతదేహం పూర్తిగా కుళ్లిన తరువాత ప్లాస్టిక్‌ సంచులను ఎవరికీ అనుమానం రాకుండా పూడ్చిపెట్టాలని నిందితులు ప్రణాళిక వేసుకుని ఉండొచ్చునని పోలీసులు భావిస్తున్నారు. ఈ కేసులో ప్రధాన నిందితుడిగా అనుమానిస్తున్న రుషి (40) పోలీసుల అదుపులో ఉన్నట్లు అత్యంత విశ్వసనీయ సమాచారం. రుషి స్వస్థలం పార్వతీపురం మన్యం జిల్లాలోని సీతంపేట. అతను అద్దెకు ఉంటున్న ఇంట్లో లభించిన మృతదేహం ఎవరిదన్న విషయాన్ని పోలీసులు రహస్యంగానే ఉంచుతున్నారు. నిందితుడికి సహకరించిన వ్యక్తులు ఎవరు? ఎందుకు హత్య చేయాల్సి వచ్చింది? తదితర వివరాలను రాబడుతున్నారు.