10.61 మెట్రిక్‌ టన్నుల ఎరువులు సీజ్‌

దుకాణంలో రికార్డులు పరిశీలిస్తున్న జేడీఏ చంద్రనాయక్‌, ఏవో ప్రసాద్‌

జిల్లా వ్యవసాయం, న్యూస్‌టుడే: ఎరువులు, పురుగు మందులు, విత్తన విక్రయ దుకాణాలపై శనివారం వ్యవసాయశాఖ అధికారులు విస్తృతంగా దాడులు నిర్వహించారు. అనంత నగరంలో జేడీఏ చంద్రనాయక్‌, ఇతర సిబ్బందిలో కలిసి తనిఖీలు చేశారు. సంజీవరాయ ఫర్టిలైజర్‌, బాలాజీ అగ్రి ఇన్‌పుట్‌, లక్ష్మీవెంకటేశ్వర ఫర్టిలైజర్‌, పాలెం ఆగ్రో సెంటర్‌, ధరణి ఫెస్టిసైడ్స్‌ అండ్‌ సీడ్స్‌ దుకాణాల్లో తనిఖీ చేశారు. రూ.9,45,577 విలువైన 10.61 మెట్రిక్‌ టన్నుల ఎరువులు, విత్తనాలను సీజ్‌ చేసినట్లు జేడీఏ తెలిపారు. ఆయా దుకాణాదారులపై 6-ఎ కేసులు నమోదు చేశామన్నారు. దుకాణాదారులు నిబంధనలు పాటించడం లేదని చెప్పారు. ఏ కంపెనీతో ఏయే ఎరువులు, పురుగు మందులు, విత్తనాల కొనుగోలు చేశారన్న సోర్స్‌ సర్టిఫికెట్టు లేకపోవడం, కాలం చెల్లినవి తనిఖీల్లో గుర్తించామని పేర్కొన్నారు. ఖరీఫ్‌సీజన్‌లో ఎరువులు, పురుగు మందులు, విత్తనాలు అనుమతి లేకుండా విక్రయించవద్దని ఆదేశించారు. కృత్రిమ కొరత సృష్టించి, అధిక ధరలకు అమ్మితే చర్యలు తప్పవని హెచ్చరించారు. కార్యక్రమంలో ఏడీఏ వెంకట్రాముడు, వ్యవసాయాధికారుల వెంకటేశ్వరప్రసాద్‌, సోమశేఖర్‌, బాలూనాయక్‌, ఆదిలక్ష్మి, అర్చన పాల్గొన్నారు.