రైలు వేళల్లో మార్పులు

గుంతకల్లు, న్యూస్‌టుడే: గుంతకల్లు డివిజన్‌ గుండా ప్రయాణించే కొన్ని రైళ్ల వేళలను మార్పు చేసినట్లు డివిజన్‌ అధికారులు సోమవారం ఒక ప్రకటనలో తెలిపారు. గుంతకల్లులో ఉదయం 7.30కు బయలుదేరే గుంతకల్లు-తిరుపతి ప్యాసింజర్‌ రైలు(07655) ప్రస్తుతం 6.45కు బయలుదేరుతుంది. గుంతకల్లు నుంచి చిక్‌జజూర్‌ వెళ్లే ప్యాసింజరు(07586) ఉదయం 7.40కు కాకుండా 7.15కు బయలుదేరుతుంది. న్యూదిల్లీ నుంచి బెంగళూరు వెళ్లే కర్ణాటక ఎక్స్‌ప్రెస్‌ గుంతకల్లుకు తెల్లవారుజాము 5.20కు వస్తుంది. ముంబయి- ఉద్యాన్‌ ఎక్స్‌ప్రెస్‌ (11301) రాత్రి 10.30కు, నిజామాబాద్‌ నుంచి తిరుపతి వెళ్లే రాయలసీమ ఎక్స్‌ప్రెస్‌ రాత్రి 12.25కు, బెంగళూరు- నాందేడ్‌ రైలు తెల్లవారుజాము 5.50కు గుంతకల్లుకు వస్తుందని అధికారులు పేర్కొన్నారు.