ఎన్నికల వ్యయ పరిశీలకుడి రాక

నితిన్‌ అగర్వాల్‌కు స్వాగతం పలుకుతున్న కలెక్టర్‌ వినోద్‌కుమార్‌, ఎస్పీ అమిత్‌ బర్దర్‌

అనంతపురం(శ్రీనివాస్‌నగర్‌), న్యూస్‌టుడే: సార్వత్రిక ఎన్నికల నామినేషన్ల పర్వం గురువారం మొదలు కానున్న నేపథ్యంలో ఎన్నికల వ్యయ పరిశీలకుడు నితిన్‌ అగర్వాల్‌ జిల్లాకు చేరుకున్నారు. బుధవారం ఆయన అనంత నగర పోలీసు అతిథి భవన సముదాయంలో బస చేశారు. ఈయనకు కలెక్టర్‌ డాక్టర్‌ వినోద్‌కుమార్‌, ఎస్పీ అమిత్‌ బర్దర్‌ పుష్పగుచ్ఛాలను అందజేసి స్వాగతం పలికారు. ఎన్నికల వ్యయ పరిశీలకుడు నితిన్‌ అగర్వాల్‌ రాయదుర్గం, ఉరవకొండ, గుంతకల్లు, తాడిపత్రి నియోజకవర్గాల్లోని అభ్యర్థుల ఎన్నికల వ్యయంపై నిఘా ఉంచనున్నారు. ఆయా ప్రాంతాలకు సంబంధించిన మ్యాప్‌, ఎన్నికల వివరాలను అడిగి తెలుసుకున్నారు.

కలెక్టర్‌ కార్యాలయం కమాండ్‌ కంట్రోల్‌ రూంలోని వివిధ విభాగాలతో కలెక్టర్‌ వినోద్‌కుమార్‌ పలు అంశాలపై మాట్లాడారు. ఎన్నికలకు సంబంధించి అన్ని రకాల నివేదికలు జాప్యం లేకుండా సీఈఓకు పంపాలన్నారు. నిర్దేశిత ప్రొఫార్మా ప్రకారం నివేదికల తయారీ, సిపార్సులో ఎలాంటి ఆలస్యం ఉండటానికి వీలులేదన్నారు.