‘తెదేపా ఎమ్మెల్యేలపై దాడి తగదు’

తిరుపతి(నగరం): శాసనసభలో తెదేపా ఎమ్మెల్యేలపై వైకాపా ఎమ్మెల్యేలు దాడి  చేయడం తగదని తిరుపతి పార్లమెంట్‌ నియోజకవర్గ తెదేపా అధ్యక్షుడు జి.నరసింహయాదవ్‌ అన్నారు. సోమవారం నగరంలోని ఆ పార్టీ పార్లమెంట్‌ నియోజకవర్గ కార్యాలయంలో జరిగిన విలేకరుల సమావేశంలో మాట్లాడుతూ.. ఎమ్మెల్సీ ఎన్నికల్లో తెదేపా విజయాన్ని అధికార పార్టీ జీర్ణించుకోలేక పోతోందన్నారు. ప్రభుత్వ పాలనను నిలదీస్తున్న తెదేపా ఎమ్మెల్యేలపై జరిగిన దాడిని ప్రజాస్వామ్యవాదులందరూ ఖండించాలన్నారు. రానున్న ఎన్నికల్లో తెదేపాను గెలిపించడం ద్వారా గుండాగిరి ప్రభుత్వానికి ప్రజలు గుణపాఠం చెప్పాలని పిలుపునిచ్చారు. దాడిని  మాజీ ఎమ్మెల్యే సుగుణమ్మ ప్రకటనలో ఖండించారు.