పాళ్యం అడవిలో చిరుత సంచారం

పెనుమూరు, న్యూస్‌టుడే: పాళ్యం అడవిలో చిరుత సంచారంపై ప్రజలు భయాందోళనకు గురవుతున్నారు. గురువారం ఉదయం పెనుమూరు-నేండ్రగుంట మార్గంలో రాజా ఇండ్లు సమీపంలోని అటవీ ప్రాంతం వద్ద చిరుత రోడ్డు దాటుతుండగా అప్పుడే ఆ మార్గంలో వచ్చిన బంగారం అనే ఆటో డ్రైవర్‌ చూశాడని స్థానికులు తెలిపారు. చిరుతను చూసి అతను ఆటోను వెనక్కి మళ్లిస్తుండగా అప్పుడే వచ్చిన కారు సైతం వెనక్కి మళ్లిందని చెప్పారు. అటవీశాఖ సెక్షన్‌ అధికారి భారతి ఆధ్వర్యంలో బీట్‌ ఆఫీసర్లు గీత, సయ్యద్‌బాషా స్థానికుల సాయంతో పరిసర ప్రాంతాల్లోని కుంటలు, చెరువుల వద్ద గాలించారు. ఎక్కడా చిరుత ఆనవాళ్లు దొరకలేదని బీట్‌ ఆఫీసర్‌ గీత తెలిపారు.