వైకాపా ఒంటరిగా పోటీ: మంత్రి రోజా

తిరుపతి (నగరం), న్యూస్‌టుడే: రాష్ట్రంలో వచ్చే ఎన్నికల్లో 175 స్థానాల్లో ఒంటరిగా పోటీ చేసే సత్తా వైకాపాకు ఉందని రాష్ట్ర మంత్రి ఆర్‌కే రోజా అన్నారు. బుధవారం తిరుపతి శిల్పారామంలో అఖిల భారత డ్వాక్రా బజారు ప్రారంభ కార్యక్రమంలో పాల్గొని విలేకరులతో మాట్లాడారు. వైకాపా ఎమ్మెల్యేలు తెదేపాకు టచ్‌లో ఉన్నారని అచ్చెన్నాయుడు చెప్పడం హాస్యాస్పదంగా ఉందన్నారు. తెదేపా అధికారంలో ఉన్నప్పుడు ఏనాడు చంద్రబాబుకు తమ నేత ఎన్టీఆర్‌ గుర్తు రాలేదన్నారు. ఎన్నికలు వస్తున్నాయి కాబట్టి ఆవిర్భావ దినోత్సవాల పేరుతో సంబరాలు చేసుకుంటున్నారని విమర్శించారు. తెదేపా ప్రభుత్వ హయాంలో ఎందుకు కళాశాలలు, యూనివర్సిటీలకు ఎన్టీఆర్‌ పేరు పెట్టలేదని ప్రశ్నించారు.పాదయాత్రలో లోకేశ్‌ ఇష్టానుసారంగా మాట్లాడటం తగదన్నారు.