అంబేడ్కర్‌ స్ఫూర్తితో ముందడుగు

గుంటూరు, న్యూస్‌టుడే: అంబేడ్కర్‌ని స్ఫూర్తిగా తీసుకుని విద్యార్థులు ఉన్నతంగా ఎదిగేందుకు ముందడుగు వేయాలని రాష్ట్ర సాంఘిక సంక్షేమ శాఖ ప్రధాన కార్యదర్శి కె.సునీత అన్నారు. గుంటూరు నగర శివారు అడవితక్కెళ్లపాడులోని సాంఘిక సంక్షేమ గురుకుల బాలుర పాఠశాలలో అంబేడ్కర్‌ వర్ధంతి కార్యక్రమాన్ని రాష్ట్ర స్థాయిలో వర్చువల్‌ విధానంలో గురుకుల విద్యాలయాల ఉపాధ్యాయులు, విద్యార్థులతో సోమవారం నిర్వహించారు. రాష్ట్ర సాంఘిక సంక్షేమ గురుకుల విద్యాలయాల సంస్థ కార్యదర్శి కె.హర్షవర్ధన్‌, ప్రభుత్వ పాఠశాల విద్యా శాఖ సలహాదారు ఆకునూరి మురళి మాట్లాడుతూ విద్యార్థి దశ నుంచి ఎన్నో అడ్డంకులను అధిగమించి ప్రపంచం గర్వించదగిన మేధావిగా ఎదిగిన క్రమాన్ని విద్యార్థులు స్ఫూర్తిగా తీసుకోవాలన్నారు. ఆయా జిల్లాల్లోని గురుకులాల విద్యార్థులు, ఉపాధ్యాయులు అంబేడ్కర్‌ గురించి మాట్లాడారు. అనంతరం దళిత బహుజన రిసోర్సు కేంద్రం డైరెక్టరు దేవకుమార్‌ ఏర్పాటు చేసిన చిత్ర ప్రదర్శనని సునీత ప్రారంభించి సందర్శించారు.