మట్టి గుట్టలు మాయం!

మల్యాల, న్యూస్‌టుడే: మండలంలోని వరద కాలువ మట్టిని కొందరు గుత్తేదార్లు, స్తిరాస్థి వ్యాపారులు అక్రమంగా తరలించుకుపోతుండటంతో మట్టికట్టలు మాయమవుతున్నాయి. మట్టి తరలించడానికి అనుమతి పొందినట్లు అధికారులు చెబుతున్నా, తీసుకున్న అనుమతికి మట్టి తరలింపు విస్తీర్ణానికి పొంతనలేకుండా ఉంది. మండలంలోని ముత్యంపేట, నూకపల్లి, రామన్నపేట, మద్దుట్ల, గొల్లపల్లె, రాంపూర్‌ గ్రామాల శివారులోని వరద కాలువ మట్టిని రాత్రింబవళ్లు అక్రమంగా రవాణా చేస్తున్నా అధికారులు పట్టించుకోవడంలేదని పలువురు పేర్కొంటున్నారు. ముత్యంపేట శివారులోని వరద కాలువ కట్ట నుంచి కొంతకాలంగా గుత్తేదార్లు మట్టిని తరలించడంతో దాదాపు 10 ఎకరాల విస్తీర్ణంలో గుట్టలాంటి మట్టికట్ట మాయం కావడంతో ఆ ప్రాంతం చదునుగా మారింది. కొన్ని గ్రామాల శివారులో చదునుగా మారిన వరద కాలువ ప్రాంతాన్ని ఆక్రమించుకుని సాగు, అక్రమ నిర్మాణాలు చేపడుతున్నా సంబంధిత అధికారులు పట్టించుకోవడంలేదని ప్రజలు ఫిర్యాదు చేస్తున్నారు.