ప్రజా సమస్యలకు సత్వర పరిష్కారం: కలెక్టర్‌

విజ్ఞప్తులు వింటున్న అనుదీప్‌

కొత్తగూడెం కలెక్టరేట్, న్యూస్‌టుడే: ప్రజా సమస్యలను పరిష్కరించి నివేదికలను అందజేయాలని కలెక్టర్‌ అనుదీప్‌ అధికారులను ఆదేశించారు. సోమవారం ‘డయల్‌ యువర్‌ కలెక్టర్‌’ కార్యక్రమానికి  ఫోన్‌లో వివిధ ప్రాంతాల ప్రజలు చేసిన ఫిర్యాదులను ఆయన నమోదు చేసుకున్నారు. ఈ సందర్భంగా కలెక్టర్‌ అధికారులతో మాట్లాడుతూ.. ప్రజా ఫిర్యాదులను శాఖలకు పంపగానే వెంటనే స్పందించి పరిష్కరించాలన్నారు. కార్యక్రమంలో డీఆర్‌డీఓ మధుసూదన్‌రాజు, జిల్లా సంక్షేమాధికారి వరలక్ష్మి, ఎస్సీ కార్పొరేషన్‌ ఈడీ ముత్యం, ఆర్డీవో స్వర్ణలత తదితరులు పాల్గొన్నారు.
ఫిర్యాదులు కొన్ని
* ‘సర్వే నం7/7లో నాకు 8 సెంట్లు భూమి ఉంది. దీన్ని సీతారామ ప్రాజెక్టు కింద సేకరించారు. కానీ 4 సెంట్లు ఉన్నట్లే జాబితాలో చూపారు. దానికీ పరిహారం ఇవ్వలేదు’.

-  భూషమ్మ, దుమ్ముగూడెం మండలం.

* ‘సర్వే నం.512లోని మా భూమికి ఇతరులకు పట్టా జారీ చేశారు. పునః పరిశీలించి పాస్‌పుస్తకం అందించాలి.

- వెంకప్ప, అశ్వారావుపేట మండలం

* ‘సర్వే నం.9/1/2లోని మా భూమిని చెరువు శిఖంగా చూపారు. పునర్విచారణ చేపట్టి న్యాయం చేయాలి’.

- వెంకటేశ్వరరావు, దమ్మపేట మండలం.